Jańa jyl qarsańynda Almatynyń medısınalyq jedel járdem qyzmetiniń avtoparki JAC Sunray markaly 48 zamanaýı avtokólikti aldy. Onyń ishinde 12 «S» klasty jáne 36 «V» klasty kólik, dep habarlaıdy aqshamnews.kz
Jańa kólik álemdik brendterdiń ozyq medısınalyq jabdyqtarymen: reanımasıalyq qurylǵylarmen, defıbrıllátorlarmen, elektrokardıograftarmen, ókpeni jasandy jeldetý apparattarymen jáne basqa da qajetti jabdyqtarmen jabdyqtalǵan.
Bul medısınalyq jedel járdemdi eń joǵary deńgeıde kórsetýge múmkindik beredi.
Avtoparkti jańartý Almaty qalasynyń ákimdigi men Qoǵamdyq densaýlyq saqtaý basqarmasynyń qarjylandyrýynyń arqasynda múmkin boldy. Kelesi jyly taǵy 50 jedel járdem kóligin satyp alý josparlanǵan.
Kún saıyn kezekshilikke 186 brıgada kirisedi, olar kúnine 3000-nan astam shaqyrýǵa qyzmet kórsetedi.
2024 jyldyń 11 aıynyń qorytyndysy boıynsha 990 myńnan astam shaqyrý oryndaldy.
Birinshi jáne úshinshi sanattaǵy shaqyrýlarǵa jetýdiń ortasha ýaqyty 12,6 mınýtty quraıdy, bul ulttyq standarttarǵa sáıkes keledi.
Osy kezeńde 142 sátti reanımasıa jasaldy.
Búgingi kúni Almaty qalasynyń jedel járdem qyzmeti qalanyń ár aýdanynda ornalasqan 13 qosalqy stansıany qamtıdy, bul shaqyrýlarǵa jedel den qoıýdy qamtamasyz etedi.
Osy jyldyń jazynda Altaı-1 shaǵyn aýdanynda jańa qosalqy stansıa ashyldy, bul shuǵyl kómekti odan ári qoljetimdi etti.