Almatynyń Medeý aýdanynda bıyl turǵyndardyń ótinishimen júzege asyrylǵan nysandarǵa arnalǵan baspasóz týry ótti, dep habarlaıdy aqshamnews.kz
Týr barysynda eń áýeli jańa skver kórsetildi, onyń aýmaǵy 2,1 gektar. Bul skver buryn qańyrap bos jatqan jerdiń ornyna salynǵan. Medeý aýdanynyń ákimi Erkebulan Orazalınniń aıtýynsha, bul aýmaq buryn jeke menshikke tıesili bolǵan, onda qorshalǵan, qurylys qaldyqtary toly shuńqyr bolatyn. Osylaısha, bul jer eki jyldan astam ýaqyt boıy bos jatty. Jaqyn mańdaǵy turǵyn úı kesheniniń turǵyndary balalarmen serýendeıtin demalys aımaǵyn uıymdastyrýdy birneshe ret suraǵan.
Menshik ıesimen kelissózder júrgizilip, jer komýnaldyq menshikke berildi. Búginde aýmaq kóriktendirilip, ol jerde demalýǵa arnalǵan jaıly skver paıda boldy. Skverde jańa kúrkeler, oıyn alańdary, oryndyqtar, qoqys jáshikteri jáne jaryqtandyrý tirekteri ornatyldy. 175 qylqan japyraqty aǵash otyrǵyzylyp, 1100 sharshy metr kógal tóseldi, oǵan avtomatty sýarý júıesi uıymdastyryldy.
Jergilikti turǵyn Kenjegúl Islamjanova nemerelerimen demalýǵa jáne kórshilerimen kezdesý úshin jańa skverge jıi keledi.
«Buryn bos jatqan jerdiń ornyna osyndaı jańa skverdiń paıda bolǵany keremet! Eń bastysy, eshqaıda barýdyń qajeti joq, úıden shyqtyń, mine, skver. Biz nemerelerimizben kún saıyn osynda kelemiz. Olar oınap, júgirip máz bolady. Eresekterge arnalǵan demalys oryndary da bar, nemerelerdi baqylap, ózimiz de jaqsy ýaqyt ótkize alamyz. Keshkisin jaryq shamdardyń arqasynda tipti ádemi. Bizdiń aýdanymyzdyń ózgerip jatqanyna óte qýanyshtymyn!», - dedi ol.
Kelesi nysan – №98 jalpy bilim beretin mektep boldy. Onyń jobalyq syıymdylyǵy mýzyka mektebiniń kóshýi esebinen 300 orynǵa ulǵaıdy. №8 mýzyka mektep Almaty ákimdigi satyp alǵan kórshi ǵımaratqa kóshirildi.
Bosatylǵan bólmede jóndeý jumystary júrgizilip, osy jyldyń qyrkúıek aıynan bastap bastaýysh synyp oqýshylary oqı bastady. Balalary №98 mektepte oqıtyn kópbalaly ana Raıhan Óskenbaeva sheshim qabyldaýǵa belsendi qatysqanyn aıtty.
«Bizdiń mektebimiz óte jaqsy, balalarym osynda oqyǵandy unatady. Biraq jyldar óte kele mektep shamadan tys júktelip, oryn jetispedi. Sondyqtan mýzyka mektebin kóshirip, 500 sharshy metrlik ǵımaratty bosatý durys sheshim boldy. Endi bastaýysh synyptar úshin jaqsy jaǵdaı jasalǵan. Qyzym jańa, jaryq synypta oqıdy, partalary men ınteraktıvti taqtalary bar. Ol mektepke qýana barady!», - dedi ol.
Baspasóz týrynyń sońynda qatysýshylar taza sýǵa arnalǵan jańa «Balqash» rezervýaryna bardy. Almaty ákimi Erbolat Dosaevtyń tapsyrmasymen júzege asyrylǵan bul aýqymdy joba aýdannyń joǵarǵy bóligindegi kópjyldyq sý máselesin sheshti. Búginde Kamensk ústirti, Kólsaı, Iýbıleınyı jáne Muztaý aýdandarynda turatyn 20 myńnan astam turǵyn turaqty sýmen qamtylǵan.
«Buryn biz taý sýyn paıdalandyq nemese sý tasýshylardan sý alatynbyz. Eki jyl buryn sýdyń qysymy álsiz boldy, óıtkeni jeke úıler baqshasyn sýaratyn. 2023 jyly ákimniń halyqpen kezdesýine qatysyp, máseleni aıttym. Ol ýádesin oryndady, 2024 jyly bizdiń kóshege sý berildi. Ladýshkın kóshesiniń turǵyndary atynan turaqty sý úshin alǵys bildiremiz!», – dedi turǵyn Laýra Qurmanǵalıeva.
Almatyda kóriktendirý jobalary belsendi túrde qolǵa alynǵan. Bul jumysqa «Halyq qatysatyn búdjet» baǵdarlamasy úlken úles qosyp otyr. Osy mehanızmniń arqasynda ár turǵyn aýdanyn damytýǵa tikeleı áser ete alady. Baǵdarlamanyń tıimdiligin eskere otyryp, Almaty ákimi Erbolat Dosaev onyń qarjylandyrýyn 18,8 mlrd teńgege deıin ulǵaıtty, bul ótken jylmen salystyrǵanda 5,8 mlrd teńgege kóp.