Almatyda turǵyn úı qorynyń jańartylýy «Turǵyn úıdi renovasıalaý baǵdarlamasy» aıasynda jalǵasýda.
Jetisý aýdanynda 2030 jylǵa deıin 135 úıdi qamtıtyn jańa renovasıalaý baǵdarlamasy bekitildi, dep habarlaıdy aqshamnews.kz
Qazir aýdanda 304 páterdi qamtıtyn 34 eski úı buzyldy. Kelesi jyly 30 úıdiń 280 páteriniń ıesin jańa baspanaǵa kóshirý josparlanyp otyr.
Mysaly, Qrylov, Skrábın, Goncharov kósheleri men Raıymbek dańǵylynyń aýmaǵynda ınvestor 16 eski úıdiń ornyna 944 páterden turatyn 11 úıdiń qurylysyn júrgizýde.
Buzylǵan úılerdiń turǵyndary jańa úılerge kóshirildi. Búgingi tańda 9 úı tolyq aıaqtalǵan, al qalǵan 2 úı jyl sońyna deıin paıdalanýǵa beriledi.
Sonymen qatar, Botkın, Kazakov, Goncharov, Skrábın kósheleri men Raıymbek dańǵylynyń aýmaǵynda taǵy bir kompanıa 6 eski úıdiń ornyna 576 páterden turatyn 11 úı salyp jatyr.
Búginde birinshi kezektegi 3 úı paıdalanýǵa berilip, buzylǵan úılerdiń turǵyndary sol jerge kóshirildi. Qalǵan 8 úıdiń qurylysy jalǵasýda.
Baǵdarlama aıasynda jańa úıge kóshken turǵyndardyń biriniń aıtýynsha, olardyń otbasy eski, seısmıkalyq qaýipti úıdiń ornyna zamanaýı turǵyn úı keshenine kóshken.
«Biz jóndelip, daıyndalǵan, alańy birdeı jańa páter aldyq. Úıdiń qurylysy kezinde bizge ýaqytsha baspana tegin berildi. Mundaı baǵdarlamalar óte mańyzdy, sebebi árkimniń jańa turǵyn úı kesheninen páter satyp alýǵa múmkindigi joq, ásirese eski úıdegi jyljymaıtyn múlikti satý qıyn», – dedi Farıda Ishmemetova.
Aıta ketý kerek, turǵyndardy eski úılerden jaıly páterlerge kóshirýdi jedeldetý maqsatynda Almaty ákimdigi 2030 jylǵa deıingi renovasıalaý baǵdarlamasyn ázirledi.
Baǵdarlama aıasynda seısmıkalyq turaqsyz, paıdalaný merzimi ótken jáne ómirge qaýip tóndiretin úılerdi buzylady. Olardyń ornyna zamanaýı turǵyn úı keshenderi salynady.