Respýblıka kúni qarsańynda Almatyda Jedel medısınalyq járdem qyzmetine 50 jańa arnaıy avtokólikti tapsyrý rásimi ótti. Kólikterdiń kiltin qala ákimi Darhan Satybaldy tabystady.
Avtopark quramyna S klasty 12 reanımobıl jáne V klasty 38 avtokólik kirdi. Barlyq kólikter zamanaýı medısınalyq qurylǵylarmen tolyq jabdyqtalǵan jáne halyqaralyq talapqa tolyq saı keledi. Joba memleket qoldaýymen júzege asty.
Qala basshysy avtoparktiń jańarýy Almatydaǵy densaýlyq saqtaý júıesin modernızasıalaý aıasyndaǵy mańyzdy qadam ekenin atap ótip, bul shara shuǵyl medısınalyq kómektiń sapasy men jedeldigin arttyrýǵa múmkindik beretinin aıtty.
«Almaty – elimizdegi eń iri ári qarqyndy damyp kele jatqan megapolıs. Munda turǵyndarǵa ýaqytyly ári sapaly medısınalyq kómek kórsetý erekshe mańyzdy. Zamanaýı jabdyqtalǵan jańa avtokólikter dárigerler men júrgizýshilerge senimdi kómekshi bolady. Sizderdiń eńbekterińizdiń arqasynda kún saıyn myńdaǵan adamnyń ómiri qutqarylady. Biz sizderdiń kásibılikterińizdi jáne halyqqa adal qyzmetterińizdi joǵary baǵalaımyz», – dedi Darhan Satybaldy.
Búginde Almaty qalasynyń Jedel medısınalyq járdem qyzmeti 14 beket pen 188 shuǵyl qyzmet brıgadasynan turady. Dıspecherlik ortalyq táýligine shamamen 3 myń qońyraý qabyldaıdy, al brıgadalar kúnine 2600-ge jýyq shaqyrtýǵa shyǵady.