Almatyda «Táýelsizdik urpaqtary» grantynyń jeńimpazdaryn saltanatty marapattaý rásimi ótti. Shara qalalyq Jastar saıasaty basqarmasynyń qoldaýymen uıymdastyryldy, dep habarlaıdy aqshamnews.kz
Jastardyń bastamalaryn qoldaýǵa baǵyttalǵan bul grantqa 150-den astam ótinim kelip túsken. Nátıjesinde komısıa sheshimimen 6 baǵyt boıynsha 13 erekshe joba usynǵan talantty jastarǵa 1 000 000 teńgeden úlestirildi. Atap aıtqanda, grant ıegerleri ǵylym, mádenıet, aqparattyq tehnologıalar, bıznes, medıa jáne volonterlik salalary boıynsha marapattaldy.
«Elimiz táýelsizdik alǵannan beri rýhy men oıy erkin jastardyń tutas býyny ósti. Otanymyzdyń órkendeýine óz úlesterin qosyp jatqan Táýelsizdik balalarynyń tolqyny ósýde. Prezıdenttiń tapsyrmasymen osy granttar jas qazaqstandyqtardy qoldaý maqsatynda júzege asyrylyp keledi. Bul olardyń tyń ıdeıalary men jobalaryn júzege asyrýǵa múmkindik beredi», — dep atap ótti Almaty qalasy Jastar saıasaty basqarmasynyń jastardy áleýmettendirý jáne jastar bastamalaryn qoldaý bóliminiń basshysy Nursultan Bekqaıyrov
Jobanyń basty maqsaty – jastardyń belsendi ári shyǵarmashyl qaýymdastyǵyn qalyptastyrýǵa baǵyttalǵan bastamalardy qoldaý, sondaı-aq jastardyń qoǵamdyq mańyzdy sharalarǵa qatysýy arqyly Otanǵa degen súıispenshiligi men patrıottyq sezimin damytý deıdi uıymdastyrýshylar.
«Bul jobanyń bastalǵanyn áleýmettik jelilerden kórip, baǵymdy synap kóreıin dep sheshtim. Komısıa sheshiminen keıin uıymdastyrýshylar “jeńimpaz atandyńyz” - dep, habarlasqanda qatty qýandym. Aldaǵy ýaqytta jobany jastarǵa jáne qoǵamǵa paıdasyn tıgizý úshin barynsha sapaly jasaýǵa tyrysamyz», - dedi bıznes baǵyty boıynsha grant ıesi Núsipbaeva Juldyz.
Saltanatty sharaǵa qoǵam belsendileri, úkimettik emes uıymdarynyń ókilderi jáne belsendi qala jastary qatysty. Marapattaý rásiminen keıin qonaqtar úshin konserttik baǵdarlama uıymdastyryldy.