Almatynyń eki mıllıonynshy turǵyny polısıa qyzmetkeri men balabaqsha tárbıeshisiniń otbasynda dúnıege keldi.
Megapolıs ákimi Baqytjan Saǵyntaev qalanyń eki mıllıonynshy turǵyny atanǵan Aıala Jambyldyń otbasynda boldy, dep habarlaıdy Almaty-akshamy.kz.
Ulttyq statısıka búrosynyń málimeti boıynsha, qazaqstandyqtardyń sany 19 mıllıonǵa jetti, al Almatyda bul kórsetkish eki mıllıondyq mejeden asty.
Aıala Jambyl polısıa qyzmetkeri Beıbit Ábildaev pen balabaqsha tárbıeshisi Álıa Janybekovanyń otbasynda dúnıege keldi. Ol – otbasyndaǵy altynshy qyz. B. Saǵyntaev jańa týǵan nárestege jáne onyń ata-anasyna densaýlyq, baq-bereke jáne baqyt tiledi.
Beıbittiń anasy Rysty Satylǵanova Aıalanyń on ekinshi nemeresi ekenin jáne kútpegen jerden tanymal bolǵanyn aıtady. Aıta keterligi, qalalyq ulttyq statısıka búrosynyń mamandary kishkentaı náresteniń Almatynyń eki mıllıonshy turǵyny bolǵanyn anyqtaǵan.
«Biz "Qarǵaly" shaǵynaýdanynda Almaty oblysynyń Qarasaı aýdanyna qarasty bolǵan kezden bastap turamyz. Qalaǵa qosylǵannan beri kóptegen ózgerister boldy. Birinshiden, barlyq kósheler jaryqtandyryldy, joldar jóndeldi jáne trotýarlar tóseldi. Kelesi jyly sýmen qamtamasyz etý máselesi sheshiledi, óıtkeni Qarǵaly ózeninde jańa sý stansıasy iske qosylatyn bolady», - dedi R. Satylǵanova.
Aıalanyń ata-analary Beıbit pen Álıanyń aıtýynsha, qazirgi kezdegi basty mindet – densaýlyqty saqtaý, sondyqtan koronavırýsqa qarsy túratyn ekpe saldyrý qajet ekenin, balalardyń qalypty ómir súrýi jáne oqýy, salaýatty qoǵamda ómir súrýi úshin ekpe saldyrý kerek.
Abaı atyndaǵy QazUPÝ saıasattaný jáne áleýmettik-fılosofıalyq pánder kafedrasynyń meńgerýshisi Jomart Siltikov Almaty qalasy turǵyndarynyń demografıalyq ósimi «Shetsiz qala» qaǵıdasyna sáıkes áleýmettik jáne ınjenerlik ınfraqurylymdy jaqsartý boıynsha qabyldanǵan sharalardyń nátıjesi ekenin atap ótti.
«Táýelsizdiktiń 30 jylynda Almaty Ortalyq Azıa aımaǵyndaǵy eń iri qalaǵa aınaldy. Mádenı-ekonomıkalyq ortalyq retinde qala odan ári damı beredi. Bul proses oń áser etedi, óıtkeni ekonomıkalyq belsendi halyqtyń úlesi ósedi. Halyqtyń demografıalyq ósýi qolaıly ómir súrý jaǵdaılaryn jasaý, jumys oryndaryn qurý, jańa tehnologıalardy damytý, megapolıste ómirdiń barlyq salalaryn sıfrlandyrý boıynsha bar máselelerdi sheshýge múmkindik beredi», - dedi J. Siltikov.