Densaýlyq saqtaý salasyn jetildirýge qosymsha 18,7 mlrd teńge bólindi. Bul qarajat Almatydaǵy medısınalyq mekemelerdiń aýqymdy jańǵyrtý jumystaryna baǵyttalady. Bul týraly Almaty qarjy basqarmasynyń basshysy Qanat Sýhambekov aıtty.
«Qalqaman» shaǵyn aýdanyndaǵy №7 qalalyq klınıkalyq aýrýhana men Túrksib aýdanyndaǵy №4 qalalyq klınıkalyq aýrýhanany jańǵyrtý jumystary bastalady. Joba aıasynda emdeý korpýstary jańartylyp, zamanaýı medısınalyq jabdyqtar satyp alynady. Sondaı-aq, jańa jeldetý jáne energıa únemdeý júıeleri engiziledi.
«Ásirese, Bostandyq aýdanynda 500 adamdy qabyldaı alatyn jańa emhananyń qurylysyn erekshe atap ótkim keledi. Bul aýdan turǵyndary úshin sapaly medısınalyq kómektiń qoljetimdiligin qamtamasyz etedi», – dedi Qanat Sýhambekov.
Onyń aıtýynsha, Alataý aýdanynyń «Saıaly» shaǵyn aýdanynda jáne Túrksib aýdanyndaǵy Aıbasov kóshesinde salynyp jatqan otbasylyq-dárigerlik ambýlatorıalardyń qurylysy aıaqtalýǵa jaqyn. Bul nysandardy bıyl shilde aıynda paıdalanýǵa berý josparlanyp otyr.
Aıta keteıik, Almatyda densaýlyq saqtaý salasyna bólinetin qarjy qala ákimi Erbolat Dosaevtyń tapsyrmasymen medısınalyq ınfraqurylymdy jańǵyrtýǵa baǵyttalyp otyr.