Birneshe aýdanda ǵımarattar bıiktigi shekteledi
Qalalyq máslıhat «Almaty qalasy aýmaǵynyń fýnksıonaldyq aımaqtarynda qurylys salýdyń qala qurylysy reglamentterin iske asyrý josparyn bekitý» sheshimine ózgeris pen tolyqtyrýlar engizý sheshim qabyldady, dep habarlaıdy Almaty-akshamy.kz QazAqparat-qa silteme jasap.
Almatynyń birneshe aýdanynda kópqabatty úı salýǵa tyıym salynady. Máslıhat sheshiminiń jobasy qoǵamdyq talqylaý úshin Ashyq NQA portalynda jarıalandy. «Abaı dańǵylynyń ońtústiginde, ál-Farabı dańǵylynyń soltústiginde, Iassaýı kóshesiniń shyǵysynda, Shyǵys aınalma jolynyń (SHAAJ ) batysynda ornalasqan turǵyn úılerdiń ruqsat etilgen maksımaldy bıiktigi ǵımarattardyń barlyq túrleri úshin 6-9 qabattan aspaıdy. Qurylystyń barlyq ortasha josparly bıiktigi shatyrdyń tóbesine deıin 35 metrden joǵary bolmaýy tıis. Bul rette turǵyn úı ǵımarattary jaılylyqtyń úshinshi saanatynan tómen bolmaýy kerek»,- delingen qujatta. Sondaı-aq, kórsetilgen aýmaqta aýyl sharýashylyǵy maqsatyna arnalǵan jer ýchaskelerin maqsatty paıdalana otyryp bólýge jáne taý sóreleri jolaǵynda, onyń ishinde eńistigi 15 gradýs jáne odan joǵary alańdarda az qabatty ǵımarattar salýǵa jol berilmeıdi. Densaýlyq saqtaý jáne bilim berý obektilerin salýdy qospaǵanda, Shyǵys aınalma jolynyń (SHAAJ), ál-Farabı dańǵyly, Saın dańǵyly, Jandosov kóshesi (Saın dańǵylynan qala shekarasyna deıin) ońtústigine qaraı ornalasqan ǵımarattardyń parametrleri úsh qabattan artyq emes jáne densaýlyq saqtaý jáne bilim berý obektilerin salýdy qospaǵanda, eń joǵary bıiktigi on eki metrden aspaýy tıis. Almaty qalasyn josparlaý jáne qala qurylysy basqarmasynyń basshysy Almasqan Ahmedjanov ázirlengen sheshimderdiń seısmıkalyq joǵary, avtomobıl kóliginiń, ınjenerlik jáne áleýmettik ınfraqurylym damýynyń shektelýine baılanysty qurylysqa qolaısyz aımaqtardaǵy jerlerdiń jappaı ıgerilýin shekteý men demalys aımaǵyn ulǵaıtýǵa kómektesetinin atap ótti.
«Abaı dańǵylynyń ońtústigindegi, Ál-Farabı dańǵylynyń soltústigindegi, Áshimov kóshesiniń shyǵysyndaǵy, Shyǵys aınalma joly (SHAAJ) aýmaǵyndaǵy ǵımarattardyń bıiktigin shekteý aýmaqtyń tyǵyzdyǵyn, áleýmettik, kóliktik jáne ınjenerlik ınfraqurylymǵa túsetin júktemeni azaıtyp, jańa demalys aımaqtarynyń paıda bolýyna áser etedi», – dedi Almasqan Ahmedjanov.