Almaty TV: 25 jyldyq mereıtoıy jáne jańa maýsymdyq jobalary
1999 jyly qurylǵan Almaty TV elimizdegi eń kóne telearnalardyń biri bolyp sanalady. 200-den astam qyzmetkerden turatyn ujym shırek ǵasyr boıy otandyq medıaındýstrıanyń damýyna aıtarlyqtaı úles qosyp keledi, dep habarlaıdy almaty-akshamy.kz
Telearnanyń alǵashqy efıri nebári 3 saǵatqa sozylǵan bolatyn. Alǵashynda spektáklder, fılmder jáne jańalyqtar eksperıment retinde taratyldy. Keıinnen shyǵarmashylyq toptyń kúsh-jigeri arqasynda telearna kórermenderdiń ystyq yqylasyna bólene bastady.
Sońǵy jyly Almaty TV aqparattyq-saraptamalyq, mádenı jáne tanymdyq jobalarǵa basymdyq berip, 10 000-nan astam jańalyqtar sújetin, arnaıy reportajdar men derekti fılmderdi, sondaı-aq 30-dan astam baǵdarlama men telehıkaıalardy jaryqqa shyǵardy.
Telearnanyń bas dırektory Tımýr Bazarbaevtyń aıtýynsha, Almaty TV 25 jyldyq mereıtoıynda kórermenderin eki jańa maýsymmen qýantpaq. Kóktemgi maýsym kórermenderge jol tartsa, kúzgi maýsymda birneshe ǵajaıyp shoý men 7 telehıkaıa daıyndalyp jatyr.
«Mereıli jyly bizdiń ujym 40-qa jýyq áleýmettik jáne qaıyrymdylyq sharalar ótkizbek. Jańalyqtar efırinde «25 qaıyrymdy is» aıdary, al digital-platformamyzda balalarǵa arnalǵan «Armanyńa jet» jobasy jaryqqa shyǵady. Osy sátti paıdalanyp, kórermenderimizge rızashylyq bildirgim keledi. Sizderdiń qoldaýlaryńyzben telearnamyz jańa jetistikterge jete beredi dep senemin», - dedi Tımýr Bazarbaev.
2022 jyldyń tamyzynda Almaty TV respýblıkalyq mártebe alyp, Qazaqstan Respýblıkasynyń barlyq aýmaǵynda taratylatyn arnalar tizimine endi. Aýdıtorıany tehnıkalyq qamtýy 47 paıyzdan 89 paıyzǵa ósti. Sol jyly telearnanyń rebrendıngi jasalyp, brendtiń ashyq jasyl túste jańǵyrtylýy dástúrli efırlik jáne sıfrlyq ınternet-ortanyń sınergıasyn beıneledi.
2023 jyly telearnanyń bas stýdıalyq pavılony jańartylyp, zamanaýı beıimdelgish dekorasıalar men polımerlik quımaly jabyn paıdalanyldy. Stýdıanyń paıdaly aýmaǵy eki ese úlkeıtilip, Almaty qalasy ákimdiginiń qoldaýymen jańa túsirý jáne montajdaý qurylǵylary satyp alyndy.
Efırlik saıasatty jetildirý nátıjesinde Almaty TV arnasynyń teleqaralym kórsetkishteri turaqty túrde jaqsaryp keledi. «K Research Central Asia» málimetterine sáıkes, byltyr kórermen sany 4,2 mln adamǵa jetti. Memlekettik tildegi ózindik óndiris úlesi 83 paıyzǵa ósti.
Jańa aqparattyq strategıany júzege asyrý nátıjesinde telearnanyń ınternettegi orny da aıtarlyqtaı nyǵaıdy. Saıt kórsetkishteri 9 mln-nan 45 mln qaralymǵa deıin artty. YouTube jazylýshylarynyń sany 1,2 mln-nan asty. Jaqyn ýaqytta jańartylǵan veb-saıt pen onyń mobıldik nusqasy usynylady.
Bul jetistikter Almaty TV-niń otandyq medıaındýstrıadaǵy jetekshi orynǵa ıe ekendigin taǵy da bir rastaıdy. 25 jyldyq mereıtoıynda telearna kórermenderine jańa jobalar men qyzyqty baǵdarlamalar usynýǵa daıyn.