12-23 mamyry aralyǵynda Muhtar Áýezov atyndaǵy Qazaq ulttyq drama teatry Túrkistan, Shymkent, Taraz qalalarynda gastróldik saparmen óner kórsetedi, dep habarlaıdy aqshamnews.kz
Qazaq óneriniń qarashańyraǵy Muhtar Áýezov atyndaǵy Qazaq ulttyq drama teatry eń tańdaýly qoıylymdaryn Túrkistan, Shymkent, Taraz kórermeniniń nazaryna usynady.
Memleket basshysy Qasym-Jomart Toqaev 2024 jyly «Mádenıet jáne óner qyzmetkerleri kúnine» oraı ótken saltanatty jıynda Muhtar Áýezov atyndaǵy Qazaq ulttyq drama teatry ǵımaratynyń tolyǵymen qaıta jóndeýden ótetini týraly málimdegen bolatyn. Bul jumys atalǵan óner ordasynyń 100 jyldyq mereıtoı saltanatyna oraı, ıaǵnı 2026 jyly aıaqtalady.
Teatr ǵımaraty kúrdeli jóndeýge tapsyrylǵannan keıin M. Áýezov atyndaǵy Qazaq ulttyq drama teatrynyń shyǵarmashylyq ujymy respýblıka aımaqtary men alys-jaqyn shetelderge gastróldik saparlarmen baryp, óziniń biregeı jumystary – spektáklderimen qalyń jurtshylyqty qýantýda.
Ǵasyrlyq beles aldynda jasalǵan óner saparynda alys-jaqyn shet aımaqtar men el qalalarynda ult teatrynyń eń tańdaýly qoıylymdary sahnalanyp keledi. Naqty aıtqanda, Ózbekstan, Qaraqalpaqstan, Qyrǵyzstan memleketteri men Aqtóbe, Qostanaı, Qaraǵandy, Jezqazǵan syndy qalalarda gastróldik saparmen boldy. Teatr ujymynyń kezekti aıaldamasy – Túrkistan, Shymkent, Taraz shaharlary bolmaq.