2025–2026 jylǵy jylytý maýsymyna daıarlyq aıasynda Almatyda órt qaýipsizdigin qamtamasyz etý men oqys oqıǵanyń sanyn azaıtýdy kózdeıtin úlken naýqan bastaldy. Ásirese otynmen jylıtyn, qaýipti aımaqta ornalasqan úıler erekshe baqylaýǵa alyndy. Almaty qalasy TJD Memlekettik órt baqylaý basqarmasynyń basshysy Konstantın Kanın Óńirlik komýnıkasıalar qyzmetinde osylaı dep málimdedi.
15 tamyzdan bastap Almaty qalasy Tótenshe jaǵdaılar departamenti jylý maýsymynda tótenshe jaǵdaıdyń aldyn alýdy kózdeıtin is-sharalar júrgize bastady. Qazir 151 myńnan astam jeke turǵyn úı esepte tur. Qatty otynmen jylıtyn 1 450 úı men órtenýge eń beıim 5 605 úıdi baqylaýǵa alǵan.
Halyqty qulaqtandyryp, oqys jaǵdaıdyń aldyn alý úshin nasıhattaý men túsindirme jumysy da qosa qolǵa alyndy. Áleýmettik osal toptaǵylar turatyn 686 úı men oǵash qylyqty adamdar turatyn 2067 úı osyndaǵy eń qaýipti sanatqa kiredi. «Qaýipsiz pesh», «Taza tútin» men «Kómek qoly» dep atalatyn aksıalardyń aıasynda osylardyń barlyǵy tekserýden ótti.
25 qyrkúıekten bastap órt qaýipsizdigi aılyǵy da bastalady. Osy ýaqyt ishinde jeke sektordaǵy jáne kópqabatty úılerdegi turǵyndarmen kezdesip, úılerdi aralap shyqpaqpyz. TJD qyzmetkerleri turǵyndarǵa órt qaýipsizdiginiń talaptaryn túsindiredi. Turǵyndarǵa jylytý qurylǵylaryn qaýipsiz paıdalanýǵa qatysty nusqaýlyqtar men býkletter taratylady.
Bul jumys «Qyzyl Aı Qoǵamy», «Lider.kz» men «Qazaqstan eriktiler lıgasy» sıaqty uıymdar men «QazTransGaz Aımaq» AQ óndiristik bólimshesimen birlesip júzege asyp otyr. Gaz qazandyǵyn qoldanatyn úılerge erekshe nazar aýdarmaq.
Halyqtyń keńinen habardar bolýy úshin Departament órt qaýipsizdigi erejeleri týraly eske salý SMS-habarlamalaryn uıymdastyryp, 7,6 mıllıonnan astam abonent habarlama aldy.
Internette, onyń ishinde áleýmettik jelilerde 260 profılaktıkalyq materıal jaryq kórdi. Halyq kóp jınalatyn nysandarda jylý qurylǵylaryn qaýipsiz paıdalanýdy nasıhattaý jaǵy da eskerilgen.
«Jylytý maýsymy kezinde tútin shyǵaratyn qondyrǵyny keminde eki aıda bir ret tazalap turý kerek. Peshti shamadan tys qyzdyrmańyz, olardy tez tutanatyn, lap ete qalatyn zatqa jaqyn ornalastyrmańyz. Gazben jumys isteıtin peshti paıdalanýdyń nusqaýlyǵyn qatań saqtańyz. Peshti, gaz kolonkasyn, as úı plıtasyn, kerogaz ben elektr qurylǵylaryn balalardan aýlaqtaý ustap, qaraýsyz qaldyrmańyz», — dep qorytty Konstantın Kanın.