Almaty ákimi Áýezov aýdanyndaǵy jańa áleýmettik nysandar týraly aıtty
Áýezov aýdany turǵyndarynyń densaýlyǵyn qamtamasyz etý jáne densaýlyq saqtaý júıesiniń tıimdiligin arttyrý maqsatynda medısınalyq qyzmettiń sapasyn jaqsartý máselesi qala ákimdiginiń turaqty baqylaýynda. Bul týraly Almaty ákimi Erbolat Dosaev aýdan turǵyndarymen kezdesý barysynda málimdedi.
Qala basshysynyń aıtýynsha, 2025 jyldyń sáýir aıynda Taýgúl-3 shaǵyn aýdanynda ornalasqan №18 qalalyq emhananyń fılıalynyń kúrdeli jóndeýi aıaqtalady. Sondaı-aq, №16 qalalyq emhanada seısmıkalyq kúsheıtý jumystarymen birge kúrdeli jóndeý júrgizilýde. 2024 jyldyń mamyr aıynda №2 korpýstyń B blogynyń jóndeýi aıaqtalady, al maýsym aıynda №1 korpýs pen A blogynda jóndeý jumystary bastalady. Bul jergilikti turǵyndar úshin medısınalyq qyzmettiń qoljetimdiligi men sapasyn arttyrýǵa múmkindik beredi.
Buǵan qosa, aqpan aıynda Jetisý-3 shaǵyn aýdanynda «Parasat» áleýmettik qyzmet kórsetý ortalyǵynyń jańa ǵımaraty ashyldy. Jalpy aýmaǵy 1760 sharshy metr bolatyn bul ortalyq erekshe qajettiligi bar balalardy ońaltýǵa arnalǵan zamanaýı qural-jabdyqtarmen qamtamasyz etilgen.
Aıta keteıik, 2024 jyly Almatyda Mamyr, Kemel jáne Nurshashqan shaǵyn aýdandarynda úsh alǵashqy medısınalyq-sanıtarlyq kómek ortalyǵy jáne Balalar shuǵyl medısınalyq járdem ortalyǵynyń jańa qabyldaý bólimshesi paıdalanýǵa berildi.
Sonymen qatar, Saıaly shaǵyn aýdanynda emhana, Aıbasov kóshesinde alǵashqy medısınalyq-sanıtarlyq kómek ortalyǵy jáne №4 jedel járdem qosalqy stansıasy salynyp jatyr. №4 qalalyq klınıkalyq aýrýhanany, sondaı-aq Bostandyq jáne Naýryzbaı aýdandaryndaǵy emhanalardy rekonstrýksıalaý jobalaryna oń saraptamalyq qorytyndy berildi.
2024 jyldyń jeltoqsan aıynda Densaýlyq saqtaý mınıstrligimen birlesip, 2030 jylǵa deıin medısınalyq nysandardy salý jáne jańartý boıynsha kezeń-kezeńmen iske asatyn jospar bekitildi. Josparǵa sáıkes, 32 jańa densaýlyq saqtaý nysany salynyp, 14 mekeme jańǵyrtylady.