Kásibı parashútshi Oleg Toshev áýede parashútpen sekirý kezinde Qazaqstannyń eń úlken Týyn jelbirete jaıdy.
Nátıje Qazaqstannyń rekordtar kitabyna endi, dep habarlaıdy Almaty-akshamy.kz
Týdyń kólemi 800 sharshy metrdi quraıdy. Aıta ketsek, elordanyń basty flagshtok tuǵyrynda kóteriletin eń úlken Týdyń kólemi 450 sharshy metr. Aspandy baǵyndyrǵan Tý osy biregeı oqıǵaǵa arnaıy jasalǵan.
«Búgin biz elimizdiń eń úlken Týynyń Almaty aspanynda qalaı jelbiregenine kýá boldyq. Osy sáttiń kýágeri jáne bir bóligi bolý, elimizdiń birligi men asqaq rýhyn seziný men úshin shynymen baqyt», - dedi KINES Qazaqstan rekordtar kitabynyń ókili Qýandyq Qudaıbergenov.
Ol sekirýdiń qıyndyǵyn da atap ótti.
«Bul - shyn máninde, óte qaýipti trúk, óıtkeni mundaı bıiktikte parashútpen sekirýshiler qatty soqqan jelge tap bolýy múmkin. Júktiń salmaǵyn eskere otyryp, sekirý óte qıyn dep aıta alamyz. Mundaı áreket buryn álemde qoldanylǵan, biraq Qazaqstanda alǵash ret bolyp otyr», - dep qosty Qudaıbergenov.
Aksıany elimizdiń mádenı-áleýmettik damýyna qoldaý kórsetip júrgen kásipkerler, mesenattar bastaǵan bastamashyl top uıymdastyrdy.
Uıymdastyrýshylardyń biri Jomart Qıastyń aıtýynsha, bul aksıanyń maqsaty – barsha qazaqstandyqtardyń patrıottyq rýhyn arttyrý jáne nyǵaıtý, sondaı-aq ultyna qaramastan bir-birine degen tolerantty kózqarasty, beıbit aspan uǵymyn saqtaý.
«Qazir kóp el úshin Qazaqstan tynyshtyq pen beıbitshiliktiń tiregi bolyp sanalady, muny barlyq sheteldik qaýymdastyqtyń ókilderi rastaıdy. Elimizdiń eń úlken Týynyń jelbireýi tereń oıdy jáne elimizdegi barsha halyqtyń birtutas beıbit aspan astyndaǵy birligin bildiredi», – dedi Jomart Qıas.