Jańa jyl qarsańynda Almatynyń ár aýdanynda tanymal ánshilerdiń qatysýymen kúnde konsertter ótip jatyr. Saǵat 18:00-den 20:00-ge deıin #Almaty2024jyl Qysqy Jańa jyldyq festıvál aıasynda Kenjebek Janábilov, Móldir Áýelbekova, Ómirqul Aınıazov, Álisher Qonysbaev, Raıym Ýaıs, Abaı Begeı, Asqat Tarǵyn, Altair & Abbi, Nurmuhammed Jaqyp, Muhtar hanzada, Nursultan Nurberdıev, Aqbota-Nur, Jandos Qarjaýbaı, Jiger Aýypbaev, Altynbek Táshimbetov jáne basqa da ártister sahnalarda óner kórsetýde, dep habarlaıdy almaty-akshamy.kz
Festıvál baǵdarlamasynda Aıaz ata men Aqshaqardyń, sıqyrshylar men anımatorlardyń qatysýymen jarqyn qoıylymdar bolady. Sonymen qatar konsert uıymdastyrýshylary telefondar, kolonkalar, qulaqqaptar jáne t.b. syılyqtar oınatyp jatyr. Konkýrs sharttary men konsert afıshalary Almaty qalasy Mádenıet basqarmasynyń Instagram-daǵy @almatymadeniet resmı paraqshasynda jarıalanǵan.
Sonymen, Alataý aýdanynyń turǵyndary «Almaty-Arena» alańynda uıymdastyrylǵan jańa jyldyq konsertterdi tamashalaı alady. Sport kesheniniń aldyndaǵy alań shyrshamen jáne jańa jyldyq kompozısıalarmen ásem bezendirilgen. Qyzyqty shoý-baǵdarlama halyqqa jaqsy kóńil-kúı syılaıtyny sózsiz.
Áýezov aýdanynda Natalá Sas atyndaǵy balalar men jasóspirimderge arnalǵan memlekettik akademıalyq orys teatrynyń aldyndaǵy alań halyq jınalatyn tanymal demalys alańyna aınaldy. Kúndiz teatrda «Ertegiler álemindegi jańa jyldyq kaleıdoskop» shoýy usynylǵan, al keshki ýaqytta merekelik konsert teatr aldyndaǵy ashyq alańda ótedi.
Al Bostandyq aýdanynda Qysqy Jańa jyldyq festıvál «Atakent» aldyndaǵy alańda ótip jatyr. Konsert júrgizýshileri men tanymal ánshiler halyqqa jaqsy kóńil-kúı syılap, túrli syılyqtar oınatady. Aıtpaqshy, aýdan turǵyndary áleýmettik jelilerde konserttik baǵdarlamalardy dál osy jerde uıymdastyrýdy suraǵan bolatyn.
Jetisý aýdanynda negizgi jańa jyldyq is-sharalar Aınabulaq-2 sh/a ótip jatyr. Aýdandaǵy «Arbat» kópten beri tanymal demalys ornyna aınalǵan, endi munda aýdan halqy úshin estrada juldyzdarynyń qatysýymen konserttik baǵdarlamalar uıymdastyryldy.
Túrksib aýdanynda merekelik konsertter Seıfýllın dańǵylyndaǵy №6 oqýshylar úıiniń janynda ótip jatyr. Munda konsertten bólek, anımatorlardyń qatysýymen túrli oıyndar, baıqaýlar uıymdastyrylǵan.
Naýryzbaı aýdanynda kópshilik konsertti jergilikti ákimdiktiń aldynda (Shuǵyla sh/a, 347) tamashalaı alady. Tanymal ánshiler halyq súıip tyńdaıtyn ánderdi oryndasa, kesh júrgizýshileri men ertegi keıipkerleri qyzyqty oıyndar ótkizip jatyr.
Esterińizge sala keteıik, Medeý jáne Almaly aýdandarynda Abaı alańy (16:00-21:00 aralyǵynda) men Astana alańynda (19:00-20:00 aralyǵynda) 21 jeltoqsannan beri Nazima, Mıras Júginisov, MDee, Abdr, Ayau, Dequine, Yenlik, DJSlimKZ, grow kids teatry, Galam jáne Ava band LIVE-bendteri, Erkesh Hasen, Álı Oqapov, Ayree, D-band, Mercury band, Ademi, Elizat, IL Canto kvarteti jáne KeshYou toby syndy tanymal ártisterdiń qatysýymen konserttik baǵdarlamalar jalǵasyp jatyr. Sondaı-aq balalar úshin anımatorlardyń, Aıaz ata men Aqshaqardyń qatysýymen túrli oıyndar, karaoke jáne basqa da jarystar ótýde.
Al 31 jeltoqsanda 20:00-den bastap 00:00-ge deıin Astana alańynda Aybekman, Malıka Yes, Dıeta KZ, Elizat, Parvız Nazarov, Indıra Elemes, Qaırat Qapanov, Rano Ýmarova men Ásel Talasan, Mádı Rymbaev, Ayafank, Nurjan Kermenbaev, KeshYou toby, Shoqan, Lýına, Turar, «Alfa» toby syndy estrada juldyzdarynyń qatysýymen konsert ótedi. Jańa jyldyq sharalar Astana alańyndaǵy merekelik ot shashýmen aıaqtalady.
