Nurkent shaǵynaýdanynda zamanaýı balalar oıyn alańyn abattandyrý aıaqtaldy. Joba «Halyq qatysatyn búdjet» baǵdarlamasy aıasynda Alataý aýdany ákiminiń apparaty men «EL-KZ 2020» JSHS merdigerlik uıymynyń birlesken kúshimen júzege asyryldy.
Negizgi maqsat – turǵyndarǵa qaýipsiz ári jaıly demalys pen sport alańyn qalyptastyrý.
Alańda oıyn keshenderi, sporttyq trenajerler, vorkaýt-aımaq, átkenshekter men oryndyqtar ornatyldy. Balalardyń qaýipsizdigi úshin jumsaq tartan jabyny tóselip, jańa jaryq shamdary qoıyldy. Sondaı-aq demalýǵa arnalǵan bólek aımaq jabdyqtaldy.
Qazirgi tańda nysan tolyq daıyn jáne turǵyndardyń paıdalanýyna ashyq. Jergilikti turǵyndar jańa alańnyń otbasylyq demalys ornyna aınalǵanyn atap ótýde.
«Oıyn alańy óte ádemi jáne qolaıly. Balalardyń qýanyshy erekshe – oınaıdy, júgirip, átkenshek tebedi. Aldaǵy ýaqytta osyndaı zamanaýı demalys oryndary aýdanda kóbeıe bersin», – dedi «Nurkent» shaǵynaýdanynyń turǵyny.