Almatydaǵy haıýanattar baǵynda 25 jyl boıy jumys istep kele jatqan Azamat Dúısenov zoobaqtyń qurmetti qyzmetkeri atandy.
Azamattyń janýarlarǵa degen qyzyǵýshylyǵy mektep jasynan bastalǵan. Oǵan ata-anasy alǵash ret akvarıým men balyq syılaǵan. Oǵan qosa mysyq pen ıti bolypty. Veterınar mamandyǵyna betburysy qyzyǵýshylyqtan emes mysyqty emdemek bolǵan áreketinen bastalypty. Mysyǵyn emdeı almaǵan Azamat mal dárigeri bolýǵa bel býǵan.
«Mysyǵymnyń bas-mı jaraqaty aýyr boldy. Qozǵalmaı jatqan janýardy óz kúshimmen emdemek boldym. Úıde vıtamın, dáriler jáne shprıs boldy. Vıtamındi ýkol arqyly az-azdan saldym. Biraq kómektespedi», - deıdi Almaty haıýanattar baǵynyń bas veterınar dárigeri Azamat Dúısenov.
Veterınardyń aıtýynsha, ár janýardyń ózindik minezi bar. Keıbireýlerin qorshaýǵa kirip, erkin tekserýge bolady. Keıbireýlerin aldyn ala daıyndaý kerek. Mysaly, arystannyń este saqtaý qabileti jaqsy damyǵan. Ózine ıne salǵan adamdy uzaq ýaqyt umytpaıdy.
Haıýanattar baǵyndaǵy janýarlardy tekserý tań qylaý bergennen bastalady. Mundaǵy ár bólimniń arnaıy veterınary bolady eken. Mysaly, Dáýren Kenjebaev osynda 15 jyldan beri jumys isteıdi. Alǵashynda áriptesi Azamattan kóp nárse úırengenin aıtady.
«Janýarlardy óte jaqsy kóretin azamattyń biri dep aıta alamyn. Bul Azamat endi ár janýardyń minez-qulqyn, ereksheligin óte jaqsy biledi. Azamatty da bizdegi janýarlardyń birazy tanıdy dep aıta alamyz», - deıdi Jyrtqysh sútqorektiler bóliminiń jetekshisi Dáýren Kenjebaev.
Azamat Dúısenovtiń pikirinshe veterınardyń jumysy balalar pedıatorynyń qyzmeti ispetti. Táýliktiń kez-kelgen ýaqytyna, aýa raıynyń qolaısyzdyǵyna qaramastan qajet kezde osynnan tabylyp, janýarlarǵa kómek kórsetý kerek.