Almatydaǵy memlekettik tabıǵı eskertkish – Baým toǵaıy aýmaǵynda qalanyń Ýrbanıstıka ortalyǵynyń ókilderi belsendi qala turǵyndary jáne ózge de qoǵam ókilderimen kezdesti. Basqosýda toǵaı aýmaǵyn abattandyrý jobasy talqylandy.
Kezdesý barysynda áleýmettik zertteýlerdiń nátıjeleri men aldaǵy qaıta jańartý tujyrymdamasy usynyldy. Qatysýshylar pikir almasyp, joba aıasynda toǵaıdyń tabıǵı ekojúıesin saqtaý mańyzdy ekenin atap ótti.
Jobanyń negizgi elementteri tabıǵı tepe-teńdikti saqtaýǵa baǵyttalǵan ekologıalyq aımaqtarǵa bólý, jasyl jelekti saqtaý jáne qalpyna keltirý, apatty jaǵdaıdaǵy aǵashtardan kezeń-kezeńimen tazartý, aýrýlar men zıankesterge qarsy kúres, jańa kóshetter otyrǵyzý jumystaryn qamtıdy. Sondaı-aq, ekojúıeni qalpyna keltirýge erekshe nazar aýdarylyp otyr: aryq júıesin jańartý, jabaıy janýarlardyń tirshilik etý ortasyn qorǵaý, toǵaıdy Basqarasý ózenimen baılanystyrýdy jaqsartý josparlanǵan.
Buǵan qosa, qaýipsizdikti qamtamasyz etý sharalary qarastyrylǵan: jaryqtandyrý júıesin ornatý, patrúl qyzmetin uıymdastyrý jáne avtokólik kirýin baqylaý. Rekreasıalyq ınfraqurylymdy damytý aıasynda tabıǵı ortaǵa barynsha az zıan keltire otyryp, ekologıalyq soqpaqtar, tynysh demalys aımaqtary, balalar jáne sport alańdaryn salý kózdelip otyr. Jobada aǵartýshylyq baǵyt ta mańyzdy: vızıt-ortalyq, aqparattyq taqtalar, oqýshylarǵa bıologıa sabaqtaryn ótkizý jáne ekologıalyq sanany qalyptastyrýǵa qoldaý kórsetý josparlanǵan.
Jobany iske asyrý barysynda turǵyndar men sarapshylardyń pikiri eskeriletini atap ótildi. Aldaǵy ýaqytta toǵaı aýmaǵynda mamandardyń qatysýymen ashyq talqylaýlar men baspasóz týry uıymdastyrylady.