Almaty qalasynyń Óńirlik komýnıkasıalar qyzmetinde ótken brıfıńte Qazaqstan Respýblıkasy Eńbek jáne halyqty áleýmettik qorǵaý vıse-mınıstri Nazgúl Saǵyndyqova Áleýmettik kodekstiń negizgi baǵyttaryn túsindirdi, dep habarlaıdy almaty-akshamy.kz
Prezıdent Qasym-Jomart Toqaevtyń 2020 jylǵy joldaýynda Áleýmettik kodeksti ázirleý tapsyrmasy berilgen bolatyn. Aǵymdaǵy jyldyń 16 naýryzynda normatıvtik quqyqtyq akt Senatta qabyldanyp, Memleket basshysynyń qaraýyna jiberildi.
Áleýmettik kodekste, spıker atap ótkendeı, memlekettik áleýmettik saıasattyń ortaq qaǵıdattary men baǵyttary bekitiletin bolady.
«Kodekstiń qabyldanýymen belgili bir ómirlik jaǵdaıǵa tap bolǵan adam qandaı áleýmettik qoldaý sharalary baryn jáne ony sheshýdiń yqtımal joldaryn anyqtaı alady. Kodekste áleýmettik qoldaý baǵyttarynyń ornalasýy adamnyń ómirlik sıkline sáıkes keledi. Normalar týǵannan kárilikke deıin qoldaý sharalarymen belgilenedi», - dedi vıse-mınıstr.
Sondaı-aq, onyń aıtýynsha, qujattaǵy negizgi novelalar ataýly áleýmettik qoldaýdy kúsheıtý, áleýmettik saqtandyrý jáne zeınetaqy júıesin damytý, múgedekter úshin arnaýly áleýmettik qyzmetterdiń qoljetimdiligin arttyrý, sıfrlyq jumyspen qamtý ortalyqtaryn qurý jáne eńbek naryǵyn yryqtandyrý bolyp tabylady.
Kodeks jobasy men tujyrymdamasyn ázirleý úshin mınıstrliktiń bazasynda arnaıy jumys toby quryldy. 50-den astam zań men 200-ge jýyq zańǵa táýeldi aktiler zerdelenip, áleýmettik saıasat salasyndaǵy halyqaralyq tájirıbe eskerildi. Kodeks 5 bólimnen jáne 21 taraýdan turady.
Jobanyń normalaryn naqtylaý úshin departament aqparattyq naýqan júrgizip jatyr. Mobıldi toptar jumys berýshiler, eńbek ujymdary, jergilikti atqarýshy organdar men úkimettik emes uıymdardyń qatysýymen kezdesýler ótkizýde.