52 jedel mobıldi top kezekshilikte bolady.
27 naýryzdaǵy málimet boıynsha 985 tonna qoqys pen qaldyq shyǵarylǵan, dep habarlaıdy Almaty-akshamy.kz
«Sınoptıkterdiń boljaýynsha, Almatyda 28-30 naýryz aralyǵynda jańbyr jaýady», dep habarlady Almaty ákimdiginiń baspasóz qyzmeti.
Komýnaldyq qyzmetter jaýyn-shashynǵa aldyn ala daıyndalyp, aryqtardy tazartyp jatyr. 27 naýryzdaǵy jaǵdaı boıynsha 985 tonna qoqys pen qaldyq shyǵaryldy. Ákimdiktiń málimetinshe, barlyq aryq jelisi tazartylǵan.
«Sý tasqynynyń aldyn alý úshin azamattardan aryqtardy, aǵyndy sý arnalary men kanaldarǵa qoqys tastamaýlaryn suraımyz. Sonymen qatar, mundaı áreketke barǵandar Qazaqstannyń ákimshilik quqyq buzýshylyqtar týraly kodeksiniń (ÁQBtK) 505-babyna sáıkes ákimshilik jaýapkershilikke tartylatynyn habarlaımyz», - dep habarlady Almaty ákimdigi.
Aıta ketý kerek, atalǵan Kodekstiń 505-baby boıynsha 20 AEK (2024 jyly bul 73 840 teńge) mólsherinde aıyppul salý kózdelgen.
Ákimdik jaýyn-shashyn kezeńinde sý tasqynynyń aldyn alý úshin motopompalarmen jáne sýdy tereńdetý quraldarymen jabdyqtalǵan 52 jedel mobıldi top kezekshilikte bolatynyn aıtty. 2 myń qum salynǵan qap daıyndaldy. Aýdan ákimdikteri jumys barysyn baqylaý úshin táýlik boıy kezekshilik uıymdastyrady.