Jaz bastalysymen taý etegindegi aýdan turǵyndary aýyzsýdan tarshylyq kóredi.
Olardyń aıtýynsha, bul másele jyl saıyn qaıtalanady. Jurt buǵan qurylys júrgizip jatqan kompanıalardy kinálap otyr.«Kamenskoe plato» shaǵyn aýdanynyń turǵyndary jaz shyǵysymen sýsyz qalady, dep habarlaıdy Almaty-akshamy.kz.
24.kz arnasynyń aqparatyna suıensek, mundaǵy jurtshylyq kúnimiz sýdy ańdýmen ótedi deıdi. Bul aımaqqa sý Kamenskoe ústirtindegi 3 eski uńǵyma arqyly keledi. Mamandar sý qysymynyń tómendeýiniń basty sebebin halyq sanynyń kúrt ósýimen baılanystyrady. Máselen, uńǵymadaǵy sý deńgeıi 2,5 esege azaıyp ketken.
«Iá, olar solaı dep aıtty byltyr qysta. Rejımmen beremiz dedi, biraq eshqandaı da rejımderi joq. Eshqandaı da, ótirik. Tańerteń beremiz deıdi. Tańerteń joq. Keshke beremiz deıdi. Keshke joq. Sonda bizder sýymyzǵa da túse almaımyz, ishetin de sýymyz joq. Ótirik aıtady, eshqandaı da bul jerde grafık joq», - deıdi qala turǵyny Maıra Asqarova.
Jergilikti bılik ókilderiniń aıtýynsha, osy aýmaqty sýmen qamtamasyz etý úshin 4 uńǵyma men sý rezervýarynyń jobasy ázirlenip jatyr. Bul Kamenskoe ústirti, Kólsaı, Mereıtoı jáne Muztaý shaǵyn aýdandaryn sýmen qamtamasyz etedi. Ótken aıda bastalǵan jumys osy jyldyń sońyna deıin aıaqtalady dep josparlanǵan.
«Jalpy Kamenskoe plato yqsham aýdanynda búgingi tańda resmı málimetter boıynsha 9 myńǵa jýyq adam turady. Endi basqa da málimetter boıynsha 12 myńnan 15 myńǵa deıin jýyq azamat turady. Onyń búgingi tańda jartysy ǵana Almaty sý jelilerine qosylǵan. Sońǵy 5-6 jyldarda sol qosylǵan abonementterdiń jartysy jazdyń kezinde sý jetispeýshiligin, endi sý jetispeýshilik problemasy kúndelikti jyl saıyn ózderiniń aldarynan shyǵady», - deıdi Medeý aýdanynyń ákimi Erkebulan Orazalın.
Bostandyq aýdanynyń turǵyndarynyń da sý máselesin kótergeli biraz boldy. Osy aıdyń basynda aptap ystyqta Remızovkadaǵy birneshe turǵyn úı men saıajaı keshenderi sýdan ábden tashpylyq kórdi. Basty sebep: sý sorǵylar eskirip ketken. Qýaty jetpeıdi. Bul aýmaqtyń sýyna «Orhan» seriktestigi jaýapty. Mundaǵy jurtshylyq jaǵdaıdyń jaqsy jaqqa ózgeretinine senbeıdi. Sondyqtan bılikten ózderin ortalyqtandyrylǵyn sý qubyryna qosýdy surap otyr.
«Mundaı mańyzdy kásiporyndardyń bári memleket menshiginde bolýy kerek dep esepteımiz. Al memleket tikeleı halyq aldynda jaýapty bolýy kerek. Jeke kompanıalardyń jóni múldem bólek. Olardyń ınvestısıa salatyny bar, salmaıtyny da bar. Kóbi birneshe jyl buryn jekeshelendirip alǵan kezde qandaı boldy. Sol kúıde ustap keledi. Bul jerdegi «Orhan» dál solardyń qatarynda», - deıdi qala turǵyny Ásıa Dámıtova.
Ózderiniń mindetine salǵyrt qaraǵan jeke kompanıalardyń kesirinen Ermensaı, Asqartaý, Aqtóbe shaǵyn aýdandary men Remızovka, Kýrortnoe jáne Dostyq dep atalatyn baý-baqsha seriktestikteri de sýǵa zárý. Olardyń menshiginde 50 shaqyrymǵa jýyq sý qubyry jáne 25 shaqyrym káriz júıesi bar. Turǵyndarmen kezdesken ákimdik pen mekeme ókilderi kelise otyryp, máseleni kóp uzatpaı sheshemiz dep tarasty. Al jurtshylyqtyń kútkennen basqa amaly joq.