Aýyz sý sapasy táýlik boıy qadaǵalanady. Tirshilik kózi tutynýshyǵa jetpes buryn ábden tazartylady. Taý sýy arnaıy dóńgelengen qaýyzdarǵa jınalyp, sonda tundyrylady. Tundyrylǵan móldir sý ári qaraı súzgi stansasyna baryp quıylady.
«Almaty sý» mekemesiniń mamandary halyqty taza sýmen qamtý úshin jylyna 70 myńǵa jýyq synama alady, dep habarlaıdy Almaty-akshamy.kz Almaty.tv-ge silteme jasap.
«Almaty sý» mekemesiniń mamandary halyqty taza sýmen qamtý úshin jylyna 70 myńǵa jýyq synama alady eken. Al, almatylyqtar kúnine 700 myń tekshe metr sý tutynady. Bul suranysty jabý úshin qazir qalada eki sý súzý stansasy jumys isteıdi. Jyl sońynda taǵy bireýi iske qosylady. «Súzgiden ótken sý taza sý rezervýaryna barady. Ol jerde sýdy biz taǵy da zalalsyzdandyramyz. Bul etap úzdiksiz júredi jalpy 24-te 7», – dedi qalany sýmen qamtyp otyrǵan Bas sý tazartý ǵımaratynyń ınjener-tehnology Ulbosyn Búrkitova.
Birneshe kezeńdik súzgiden ótkennen keıin sý zalalsyzdandyrylady. Zalalsyzdandyrý úshin arnaıy qarapaıym tuz qoldanylady. Tuz belgili ydysqa salynǵannan keıin arnaıy bóshkege aparyp tógiledi. Sol jerde elektrolız prosesinen ótedi. Nátıjesinde natrıı hlorıdi alynady. Alynǵan natrıı hlorıdi sýmen aralastyrylyp, sýymyz tazartylady.
Jalpy, Almatynyń 40 paıyzy taýdan keletin ózender men 60 paıyzy jerasty sýlary arqyly aýyz sýmen qamtamasyz etiledi. Bul beket arqyly Bostandyq pen Almaly aýdany sý tutynyp otyr. Qala boıynsha qazir osy sıaqty birneshe stansa salý josparlanǵan. Bireýi bıyl jyl sońynda iske qosylmaq.
«Ol salynyp bitetin bolsa, qalanyń 35 myńǵa jýyq, ıaǵnı Naýryzbaı aýdanynyń 35 myńǵa jýyq turǵyny sapaly aýyzsýmen qamtamasyz etilmek. Ol jerde Qarǵaly ózeninde súzgi stansasy salynyp jatyr», - dedi «ALMATY SÝ» MKK resmı ókili Aqbota Jylysova.
Sýdyń quramy halyqqa jetken soń da hımıalyq-bakterıologıalyq tekseristen ótip, saraptalyp otyrady. Ol úshin mamandar mektep, emhana sıaqty oryndardan kúnde synama alady.
«Sýdy qoryqpaı qoldanýyńyzǵa bolady. Sebebi tutynýshylarǵa beretin sýdy biz saǵat saıyn tekserip otyramyz. Eger sál ózgeris bolsa, biz sol jergilikti tekserip otyrǵan mekemege habarlasyp aıtyp turamyz», – dedi hımıalyq-bakterıologıalyq zerthana basshysy Kúlshat Tabaeva.
Sondaı-aq mamandar sýdyń kermektigin, túsin, dámi men ıisin de tekseredi.