Ulttyq statısıka búrosy jan basyna shaqqandaǵy azyq-túlik tutyný deregin jarıalady.
Esep 2023 jyldyń IV toqsanyndaǵy kórsetkishter negizinde daıyndalǵan, dep habarlaıdy Almaty-akshamy.kz.
Búro turǵyndardyń eń kóp tutynatyn, satyp alatyn azyq-túlik tizimi ózgermegenin málimdedi.
Qazaqstan halqy eń kóp qarjysyn et jáne et ónimderine (17.4%) jumsaıdy. Ekinshi deńgeıde suranys nan men jarma ónimderine (8%) kóp. Sondaı-aq sút ónimderin alý úshin jurtymyz tabysynyń 5,4% bóledi.
«Aımaqtar arasynda jekelegen azyq-túlik ónimderiniń tutynylýyn salystyratyn bolsaq, nan men jarma ónimderin Túrkistan oblysynyń turǵyndary eń kóp tutynǵan – 44,1 kg (toqsanyna jan basyna shaqqanda), et jáne et ónimderi boıynsha Jambyl oblysy – 25,8 kg, balyq ónimderin SHQO, BQO jáne SQO turǵyndarynyń dastarqanynan jıi kórýge bolady – bir adamǵa shaqqanda toqsanyna 5,2 kg, kókónister boıynsha Túrkistan oblysyndaǵylar – 23,8 kg, jemisti almatylyqtar kóp jeıdi – 22,1 kg, al táttiler jan basyna shaqqanda Ulytaý oblysynda – 14,4 kg kóp tutynylǵan», delingen Ulttyq statısıka búrosynyń habarlamasynda.
Keıingi bes jyldaǵy zertteýler negizinde et pen balyqty tutyný kórsetkishi jyl saıyn İV toqsanda, al kókónister men jemisterdi tutyný İİİ toqsanda kóbeıetini anyqtaldy.