Qala kúninde Almatydaǵy jasyl jelegi mol, eń kórikti aýlalar tańdaldy
Belsendilerdiń kúsh-jigeriniń arqasynda jasyl jelekke toly jergilikti aýlalar jyly da jaıly kórinedi. Almaty qalasynyń Jasyl ekonomıka basqarmasynyń basshysy Álı Raıymbaev Óńirlik komýnıkasıalar qyzmetiniń brıfıńi barysynda kógaldandyrý baıqaýynyń qalaı ótkeni týraly aıtty, dep habarlaıdy Almaty-akshamy.kz.
«Aýla aýmaǵyn kógaldandyrý - 2021» baıqaýy Qala kúnine oraılastyrylǵan. Qatysýshylar óte kóp boldy - 324 ótinish kelip tústi, onyń 84-ne komısıa músheleri daýys berdi. Ár aýlany qoǵamdyq keńes múshelerinen, landshaftyq sáýletshilerden, qoǵamdyq uıymdar basshylarynan turatyn qatal da saýatty qazylar alqasy qarady. 1-3 oryn ıegerleri elektrondy daýys berý arqyly anyqtaldy.
«Ekologıa – bizdiń jumysymyzdyń negizgi baǵyty. Aýlanyń kógaldandyrylýy ekologıalyq qana emes, áleýmettik sıpatqa da ıe. Qala turǵyndarynyń ıdeıalary sonshalyqty ádemi jáne erekshe bolyp shyqty, jeńimpazdardy tańdaý ońaı bolǵan joq. Turǵyndar óz aýlasyn qalaı kórkeıtýge bolatynyn jaqsy úlgi túrinde kórsetti. Baıqaýǵa usynylǵan ár aýla shyn máninde erekshe boldy. Búginde turǵyndar qyzyqty kompozısıalar jasaıdy, ekologıalyq taza materıaldardy paıdalanady, olar aýlasyna kishkentaı Shveısarıany ákelip ornatyp qoıǵan dep aıtýǵa bolady», - deıdi Á.Raıymbaev.
Baıqaý tamyz aıynyń sońynda jarıalandy, ótinimderdi qabyldaý 3 qyrkúıekte bastaldy. Qoǵamdyq daýys berý qorytyndysy boıynsha, júlde qory 24 jeńimpazdyń arasynda oınatyldy: Gran-prı júldesine - taýarlyq materıaldardy, aýlany abattandyrýǵa arnalǵan ósimdikterdi satyp alýǵa 5 mıllıon teńgege sertıfıkat; 8 aýdanda 1 oryn úshin - 1 mıllıon teńge; 8 aýdanda 2 oryn úshin - árqaısysy 500 myń teńge; 8 aýdanda 3 orynǵa baý-baqsha quraldary beriletin boldy.
Komısıa músheleriniń daýys berýiniń nátıjesinde Túrksib aýdanyndaǵy Montajnaıa kóshesi, 15 mekenjaıyndaǵy aýlany usynýshy Iana Chıstılına jeńimpaz dep tanyldy.
Qúramynda «TAL» arhıtektýralyq búrosynyń jetekshisi Nazerke Mýndahanova bar sáýletshilerdi aýladaǵy túrli gúder men ósimdikter tańqaldyrdy. Óńirlik komýnıkasıalar qyzmeti alańynda sóılegen sózinde ár aýlada jaqsy kútilgen aǵashtar men butalardyń kóp bolǵanyn, turǵyndardyń olardyń dızaınyna shyǵarmashylyqpen qaraǵanyn aıtty.
«Biz jasyl jelektiń jalpy jaǵdaıyn ǵana emes, sonymen qatar olardy túpteý jáne sýarý jumystaryna da nazar aýdardyq. Mysaly, aýlalardyń birinde turǵyndar ózderiniń úıinde sýarý júıesin oılap tapqan», - deıdi N.Mýndahanova.