Almatyda sý tasqynynan zardap shekken óńirlerge 10 tonnadan astam gýmanıtarlyq kómek jóneltildi, dep habarlaıdy almaty-akshamy.kz
Almaly aýdanynyń komúnıtı ortalyǵy bazasynda ashylǵan qabyldaý pýnkti 29 naýryzdan bastap jumys isteıdi. Kún saıyn almatylyqtar zardap shekken aımaqtarǵa úles qosyp, qajetti zattardy ákelip jatty. Qala turǵyndary, kásipkerler men belsendi jastar da kómek qolyn sozdy. Sonyń nátıjesinde 6 kúnniń ishinde 10 tonnaǵa jýyq gýmanıtarlyq kómek jınaldy. Atap aıtqanda, 2,5 tonnadan astam kıim, 1 tonna gıgıena quraldary, 3,5 tonnadan astam azyq-túlik, turmystyq zattar jáne t.b. bar.
Gýmanıtarlyq kómek qabyldaý pýnktiniń jumysyna qalanyń 30-dan astam iri volonterlik uıymynan 100-den astam erikti jumyldyryldy. Óz kezeginde Jastar saıasaty basqarmasy ıgi iske atsalysqan almatylyqtarǵa alǵys bildiredi. Sondaı-aq, basqarma eriktilerdiń eńbekqorlyǵy men qala turǵyndarynyń arqasynda sý basqan aımaqtarǵa qysqa merzimde kómek kórsete alatynyn atady.
Esterińizge sala keteıik, gýmanıtarlyq kómek qabyldaý pýnkti aptanyń sońyna deıin Almaly aýdany, Baıtursynov kóshesi, 22/1 mekenjaıynda jumys isteıdi, jumys ýaqyty 10:00-den 19:00-ge deıin
Qabyldanatyn gýmanıtarlyq kómek túrleri: azyq-túlik, aýyz sý, dári-dármekter men medısınalyq kerek-jaraqtar, kıim (jyly kıim, aıaq kıim, ish kıim, shulyq jáne t.b.), zattar (kórpe, uıyqtaıtyn qap, jastyq jáne t.b.), sharýashylyq taýarlary (shatyr, tósenish, termos, sham, paýerbank, sháınek, balalar ydystary, emizik) jáne gıgıena quraldary (pampers, áıelder gıgıenasy, sabyn, tis pastasy, sýsabyndar, maılyq, dárethana qaǵazy, jýǵysh zattar jáne t.b.).
