Stýdentter ınfeksıadan qorǵaný joly - vaksına salý degen oıda.
Bıyl dástúrli oqý formatyna kóshetin almatylyq stýdentter belsendi túrde vaksına saldyryp jatyr. Al, qalada egde jastaǵy ekpe alǵan adam sany 110 myńǵa jýyqtaǵan, dep habarlaıdy Almaty-akshamy.kz Almaty.tv-ge silteme jasap.
Stýdent Alýa Orynbekova búgin ekpe saldyrýǵa Uly Otan soǵysy ardagerleri emhanasynda ornalasqan pýnktke kelgen. Dárigerler onyń jalpy jáı-kúıin, dene qyzýyn, satýrasıa deńgeıi men qan qysymyn tekserip shyqty. Densaýlyǵynda kinárat bolmaǵandyqtan, oǵan búgin Spýtnık-V ekpesiniń 1-komponenti salyndy.
«Dástúrli oqý júıesine kóship jatqandyqtan, árbir stýdent ekpe alǵany jón. Emin-erkin júrýge, pandemıaǵa deıingi ómirge oralýǵa yqpal etedi dep oılaımyn», – dedi Almaly aýdanynyń turǵyny Alýa Orynbekova.
Sońǵy málimetterge sáıkes, bir táýlikte ekpeniń alǵashqy komponentin 4700-den asa, al 2-komponentin 6 myńǵa jýyq adam saldyrǵan. Al, aqpannan búginge deıin 833 myńnan astam turǵyn vaksına aldy. Onyń 110 myńǵa jýyǵy 60 jastan asqan kisi.
«Aınalańda juqpaly ınfeksıa júrgenin elestetý óte qorqynyshty. Sondyqtan ekpe saldyrýǵa bel býdym. Denimiz saý, balalarymyz aman bolýy úshin osy eń durys sheshim», – dedi Almaly aýdanynyń turǵyny Tamara Zagrısenko.
«Bastysy, densaýlyqty kútý kerek. Ózime jáne jaqyndaryma indetti juqtyrmaý úshin ekpe alyp jatyrmyn», – dedi Almaly aýdanynyń turǵyny Valerıı Lýkomskıı.
Bul emhanaǵa 30 myń turǵyn tirkelse, sonyń basym bóligi, ıaǵnı 24 myńnan kóbi, ekpe saldyrypty.
«30 myń turǵynnyń 7 myńnan astamy - dıspanserlik esepte turǵan pasıentter. Olarǵa túgelimen vaksına jasaý júrgizildi. 230-yna medotvod berildi», – dedi qalalyq UOSA emhanasy bas dárigeriniń orynbasary Saltanat Ábdirazaqova.
Qaladaǵy medısınalyq uıymdarda, mádenıet, sport obektilerinde, bazarlar men saýda ortalyqtarynda 160 vaksına egý pýnkti jumys isteıdi. Immýndaý jumystaryna 237 brıgada jumyldyrylǵan.