Stýdent jańa qosymshasyn UNAI dep ataǵan.
Almaty tehnologıalyq ýnıversıtetiniń 3-kýrs stýdenti Nurdáýlet Baıhanov jańa qosymsha qurastyrdy, dep habarlaıdy Almaty-akshamy.kz
Nurdáýlet Baıhanov jasap shyqqan qosymshanyń ereksheligi kóp. Birinshiden, UBT suraqtaryna daıyndalýǵa, ekinshiden, saraptama jasaýǵa, úshinshiden, jeke jáne toptyq saıys ótkizýge, tórtinshiden, ony tegin paıdalanýǵa bolady.
80 myńnan asa suraqty qamtyǵan qosymshany jasaýǵa jyl jarymdaı ýaqyt ketken.
«UBT-ǵa daıyndalýdyń júıkege salmaq túsiretinin bilemin. Sol sebepten, bul qosymsha «100 myń oqýshyǵa qalaı kómektese alamyz?» degen izdenisten týyndady. Maqsatym – bıyl 100 myń túlektiń osy baǵdarlamany paıdalanyp, memlekettik grantpen joǵary oqý oryndaryna túsýine kómektesý. Ár túlektiń bilimin jetildirýine kishkene bolsa da úlesimdi qosqym keldi», deıdi Nurdáýlet Baıhanov.
Avtordyń aıtýynsha, UNAI qosymshasyn App Store jáne Play market baǵdarlamasy arqyly júkteý kerek. Qosymshaǵa tirkelgen soń, bastapqy bettegi «Oınaý» batyrmasy arqyly birden UBT-ǵa daıyndyqty bastaýǵa bolady. Al arnaıy nusqaýlyqty unai.kz Instagram nemese TikTok paraqshasynan kórýge múmkindik bar.