Stýdent jarylǵysh qurylǵy jasyrylǵany týraly tórt ret jalǵan habarlama jasaǵan.
Almatylyq stýdent kolejde sabaq boldyrmaý úshin bomba týraly jalǵan habarlamalar taratqan, - dep habarlaıdy Almaty-akshamy.kz Rolisia.kz silteme jasap.
Tártip saqshylarynyń aıtýynsha, jigit tórt ret - 27, 28 aqpan jáne 2 naýryzda tańerteń eldi dúrliktirgen habarlama jibergen.
«Almatyda ekstremızmge qarsy is-qımyl bólimshesiniń qyzmetkerleri Júrgenov atyndaǵy Óner akademıasy kolejiniń kámeletke tolmaǵan stýdentin anyqtap ustady. Ol oqý ornynda jarylǵysh qurylǵy jasyrylǵany týraly birneshe ret jalǵan habarlama jasady degen kúdikke ilindi.
Ustalǵannan keıin jáne alynǵan dáleldemelerdi usynǵannan keıin ol oqý úlgerimine baılanysty oqý prosesin toqtatý úshin osy qylmysty jasaǵanyn moıyndady. Bul derek Qazaqstan Respýblıkasy Qylmystyq kodeksiniń 273-baby boıynsha tirkeldi. İİM terorızm aktisi týraly kórineý jalǵan habarlaǵany úshin bes jylǵa deıingi merzimge bas bostandyǵynan aıyrý jazasy qarastyrylǵanyn eskertedi. Mundaı qylmystardyń basym kópshiligi kezekshi táýlikte ashylady», – dedi İİM ekstremızmge qarsy is-qımyl departamenti bastyǵynyń orynbasary Darhan Razýev.
Bul qylmys úshin 14 jastan bastap qylmystyq jaýapkershilik kózdelgen. Sonymen qatar, sot sheshimi negizinde shyǵyndar men osyndaı habarlamadan keltirilgen barlyq zalal ótelýge tıis.
Eger mundaı áreketterdi kámeletke tolmaǵandar jasaǵan jaǵdaıda zalaldy óteý olardyń ata-analaryna nemese zańdy ókilderine júkteledi.
Barlyq kúshtiń bir shyǵýyna 200-den 300 myń teńgege deıin jumsalady, al kásiporyndar men saýda obektileriniń toqtap qalýynan keltirilgen zalal mıllıondaǵan teńgemen eseptelýi múmkin.
Máselen, qylmystyq isterdi tergeý barysynda memleketke osyndaı jalǵan habarlamalarmen keltirilgen materıaldyq shyǵyn jyl saıyn 500 myńnan 2 mıllıon teńgege deıin ekeni anyqtaldy.