NZM fızıka-matematıka baǵyty boıynsha oqıtyn oqýshylar Hústonda ótetin álem birinshiligine daıyndalyp jatyr.
Robototehnıkanyń qyr-syryn jetik meńgergen almatylyq jetkinshekter AQSH-ta ótetin halyqaralyq týrnırge joldama aldy, dep habarlaıdy Almaty-akshamy.kz 24.kz silteme jasap.
Nazarbaev Zıatkerlik mektebinde fızıka-matematıka baǵyty boıynsha oqıtyn oqýshylar Hústonda ótetin álem birinshiliginde de top jarsaq dep otyr. Olar jaqynda Astanada ótken respýblıkalyq saıysta jeńimpaz atandy. Qazir dúnıejúzilik jarysqa daıyndyqtaryn bastap ketti.
Almatylyq «Qyran» komandasy aýyzbirshilik pen tapqyrlyqtyń arqasynda ulttyq birinshilikte aldyna jan salmady. Olardyń bapkerlerimen birlesip jasaǵan roboty ártúrli tapsyrmalardy oryndaı alady jáne jyldam qozǵalady.
NZM tehnotorıa zerthanasynyń jetekshisi Bekzat İńkárovtyń aıtýynsha, aldyńǵy jarystardan shákirtter úlken sabaq alypty.
-«Bizdiń robot tym aýyrlaý ekenin baıqadyq. Qazir salmaǵyn biraz jeńildettik. Óıtkeni robot neǵurlym jeńildeý bolǵan saıyn, jyldamdyǵy da arta túsedi. Sondyqtan biz 3 mıllımetrlik metalmen qurastyryp shyqtyq. Robottyń maqsaty – konýsty arnaıy qurylǵylarmen munaraǵa shyǵarýy tıis. Bul jerde qazylar san men sapaǵa qaraıdy. Eń jyldam robot jeńimpaz atanady».
Rasynda robot jasaý óte jaýapty jumys. Óıtkeni ol robottyń árbir qımylyn jiti qadaǵalap otyrý kerek. Bir ǵana qatelik barlyq eńbekti esh ketiredi. Sondyqtan oqýshylar Hústondaǵy jarysqa daıyndyqty áli pysyqtaýy tıis.
«Basqa robottarmen salystyrǵanda bizdiń robot ámbebap dep aıtsam bolady. Óıtkeni ol az ǵana ýaqyttyń ishinde munaranyń basyna birneshe konýstardy shyǵara alady, - deıdi robot qurastyrýshy Imanáli Kóksal».
Aıta ketelik, Nazarbaev Zıatkerlik mektebiniń «Qyran» komandasynda 9 adam bar. Robotty jetildirý prosesi aıaqtalǵannan keıin oqýshylar praktıkalyq jattyǵýlarǵa kóshedi. Eger oqýshylar aýyzbirshilikten ajyramasa AQSH-tan oljaly qaıtýy ábden múmkin.