Almaty qalasy óńirlik komýnıkasıalar qyzmetiniń alańynda QR Tótenshe jaǵdaılar mınıstrliginiń Respýblıkalyq jedel-qutqarý jasaǵynyń ókilderi qatysqan brıfıń ótti. Qutqarýshylar bıylǵy maýsymdaǵy eń jıi kezdesetin oqıǵalar, taýly baǵyttardaǵy jumys jáne demalýshylardyń qaýipsizdigin arttyrý sharalary týraly aıtty.
TJM RJQJ málimetinshe, jyl basynan beri 478 jedel shyǵý júzege asqan. Onyń 167-si taýly jáne jetýi qıyn aýmaqtardaǵy izdestirý-qutqarý jumystary. Barlyǵy 156 adam qutqarylǵan, onyń 26-sy – balalar. Odan bólek 25 adamǵa, sonyń ishinde eki balaǵa alǵashqy medısınalyq kómek kórsetilgen. Qazirgi tańda qutqarýshylar taýda jáne sý aıdyndarynda tótenshe jaǵdaılardyń aldyn alý boıynsha aýqymdy profılaktıkalyq jumys júrgizip jatyr.
TJM RJQJ taýly bólimshesiniń bas qutqarýshysy Vadım Paktyń aıtýynsha, tájirıbesi az týrıser daıyndyqsyz jolǵa shyǵý, baǵytty týystaryna habarlamaý, navıgasıalyq jáne baılanys quraldarynyń bolmaýy sıaqty jıi birqatar qatelikterdi jiberedi.
"Taýdaǵy jazataıym jaǵdaılardyń negizgi sebepteri, birinshiden, adamnyń óz kúshin durys baǵalamaýy jáne daıyndyq deńgeıine saı kelmeıtin baǵytty tańdaýy. Sonyń saldarynan týrıs ýaqytynda orala almaıdy nemese baǵyttyń erekshelikterin bilmeı, apatty jaǵdaıǵa tap bolady. Taǵy bir qatelik – qajetti jabdyqtyń bolmaýy. Taýǵa shyǵarda mindetti túrde rúkzak, qosalqy batareıasy bar sham, baılanysqa shyǵýǵa arnalǵan paýerbank jáne jyly kıim bolýy kerek, sebebi taýda qazir salqyn ári qarańǵy tez túsedi", - dedi Vadım Pak.
Qutqarýshylardyń aıtýynsha, ár týrıs odan bólek dári qobdıshasyn, jetkilikti sý jáne azyq qoryn da alyp júrýi tıis.
Almaty mańyndaǵy taýlarda qaýipsizdikti qamtamasyz etý úshin qutqarýshylar adamdar kóp júretin baǵyttarda kezekshilik atqaryp, túsindirý jumystaryn jáne reıdter ótkizedi.
Súńgýir-qutqarý bóliminiń bas qutqarýshysy Beısenǵalı Dúısebaevtyń aıtýynsha, sý tasqyny, kóshkin, aýa temperatýrasynyń kúrt ózgerýi sıaqty aýa raıy jaǵdaılaryna baılanysty qaýip-qaterlerdiń aldyn alýǵa basa nazar aýdarylady.
"Tótenshe jaǵdaılar departamenti turǵyndarǵa aldyn ala arnaıy habarlamalar joldaıdy. Qaýipti ýchaskeler anyqtalǵan jaǵdaıda qar kóshkininen jasandy qorǵaý jáne ózen ańǵarlarynda selden qorǵaý jumystary júrgiziledi. Belgilengen aýmaqtarda baqylaý-ótkizý beketteri qoıylyp, táýlik boıy monıtorıń uıymdastyrylady. Qutqarý is-sharalaryna volonterler de tartylady", - dep atap ótti maman.
Taýdaǵy basqa da qaýipter týraly aıta otyryp, qutqarýshylar jabaıy ańdarmen kezdesý yqtımaldyǵynyń artyp kele jatqanyn atap ótti. Aıý nemese jabaıy mysyq sekildi janýarlarmen tikeleı baılanys sırek bolsa da, sońǵy jyldary mundaı jaǵdaılardyń qaýpi kóbeıgen.
"Qazir adamdardyń jabdyqtalýy jaqsarǵan: arnaıy aıaq kıim, rúkzak arqasynda olar alysqa, tereńirek taýǵa bara alady. Sol sebepti jabaıy janýarlarmen kezdesý múmkindigi de artady. Mundaı jaǵdaıda eń bastysy úreılenbeı, sabyr saqtaý. Mysaly, aıýmen kezdestińiz delik, ondaı jaǵdaıda artqa qashýǵa bolmaıdy, ornyńyzda turyp, jaılap keıin sheginý qajet. Janynda qonjyǵy bolǵan jaǵdaıda aıý qaýip sezinedi, ekeýiniń ortasynda qalyp qoısańyz, aıý shabýyldaýy múmkin", - dep túsindirdi Vadım Pak.
Qutqarýshylar qala turǵyndary men qonaqtaryna demalysty qaýipsiz ótkizý úshin qarapaıym erejelerdi este saqtaýǵa shaqyrady:
- marshrýt pen oralý ýaqytyn jaqyndaryna habarlaý;
- taýǵa jalǵyz nemese qolaısyz aýa-raıynda shyqpaý;
- ózimen birge jyly kıim, dári qobdıshasy men baılanys quraldaryn alý;
- belgilengen soqpaqtardan shyqpaý;
- tótenshe jaǵdaı týyndaǵanda 112 nómirine qońyraý shalý.