Alǵashqy tájirıbelik sabaq №1 Almaty Qazaq memlekettik gýmanıtarlyq-pedagogıkalyq kolejinde ótti.
İs-sharaǵa 250 stýdent qatysty, dep habarlaıdy Almaty-akshamy.kz Polisia.kz-ke silteme jasap.
Jekpe-jekten sport sheberleri qyzdarǵa adam ómirine qaýip tóngen jaǵdaıda qalaı qorǵaný kerektigin úıretti.
«Biz jyl saıyn júrgizetin profılaktıka ádisteriniń biri - tájirıbede ózin-ózi qorǵaý ádisterin qoldaný. Ómirde ártúrli jaǵdaılar bolady jáne árbir qyz, stýdent, kez kelgen ýaqytta qylmyskerge qarsy turýy, kóshede jalǵyz qalǵanda ózin-ózi qorǵaı alýy qajet. Keıbir ózin-ózi qorǵaý ádisterin bilý bir bólek, ony is júzinde qoldaný múldem basqa. Bala ózin-ózi qorǵaýdyń teorıalyq jáne tájirıbelik aspektilerin meńgergendigi óte mańyzdy», – dedi Almaty qalasy prokýrorynyń kómekshisi Gúlnár Janbekova.
Sabaqtardy uıymdastyrýshylardyń aıtýynsha, osyndaı trenıńter barlyq oqý oryndarynda ótkizilip jatyr. Basty maqsat – qaýipsiz is-áreket daǵdylaryn qalyptastyrý, kámeletke tolmaǵandarǵa qatysty quqyq buzýshylyqtyń aldyn alý jáne boldyrmaý.
«Sonymen qatar, stýdentterge kóshede, úıde, jolda, sondaı-aq áleýmettik jelilerde qaýipsiz júris-turys erejeleri túsindirildi. Biz jeke sýretterin jáne ózderi jaıly aqparatty bóten adamdarǵa jiberýge bolmaıtynyn aıttyq», – dedi Almaty qalalyq PD ıývenaldy polısıa bóliminiń bastyǵy Janna Shonjanova.