Ol dástúrli “Erlik sabaǵy” aıasynda ótti.
Sharaǵa Rústem Qaıdarovtyń jubaıy, Almaty qalalyq polısıa departamentiniń basshylyǵy men jeke quramy qatysty, dep habarlaıdy Almaty-akshamy.kz
«Rústem Esimhanuly qazaq polısıasynyń qalyptasýyna ólsheýsiz úles qosyp, janqıarlyq eńbegi men tańdaǵan mamandyǵyna degen adaldyǵy búgingi kúnge deıin óskeleń urpaqqa úlgi-ónege bolyp kele jatqan laıyqty ofıserlerdiń bir emes birneshe urpaǵyn tárbıelep shyǵardy. Ol óz isine degen adal qyzmetimen halyqtyń qurmetine bólendi. Ol joǵary ofıserlik qurmetti adam boldy. Rústem Esimhanuly Qazaqstan generaldar keńesiniń tóraǵasy bola tura, barlyq jaǵdaıda qarapaıym polıseıdiń múddesin qorǵap keldi. İİO-nyń ardagerlerine de kóp eńbek sińirdi. Búgingi kezdesý – onyń rýhyna taǵzym etý. Jas tártip saqshylary general Qaıdarovtyń ómiri men qyzmetiniń tarıhyn jan-jaqty bildi. Bul óskeleń urpaq polıseılerge úlgi bolatynyna senimdimin», – dedi Almaty qalalyq PD bastyǵynyń orynbasary Oljas Myrzabekov.
Ádilet general-maıory Rústem Esimhanuly Qaıdarov – KSRO İİM qyzmetkeri, QR İİM qurmetti ardageri, Reseı jaratylystaný ǵylymdary akademıasynyń korespondent-múshesi, halyqaralyq aqparattandyrý akademıasynyń akademıgi, profesor, “Generaldar keńesi” prezıdıýmynyń tóraǵasy, halyqaralyq ekologıalyq palatanyń qurmetti profesory. 20-dan astam ǵylymı maqalalar men oqý quraldarynyń avtory. Qazaq KSR qylmystyq is júrgizý kodeksi avtorlarynyń biri. BUU-nyń esirtki bıznesine qarsy kúres jónindegi komısıasynyń 39-shy sesıasynda QR Parlamentiniń jumys tobynyń múshesi boldy. Mınsk konvensıasyn ázirleý jónindegi Qazaqstan Respýblıkasy delegasıasynyń jetekshisi. “Biryńǵaı aqparattyq keńistik týraly” ZRK avtorlarynyń biri. “Parasat”, “Dostastyq juldyzy”, “Eren eńbegi úshin”, “Oıy men isi úshin” ordenderimen, KSRO-nyń, Qazaqstan Respýblıkasynyń, Reseı Federasıasynyń, Ýkraına men Belarýsıanyń 30-dan astam medaldarymen marapattalǵan.
2019 jyldyń 27 jeltoqsanynda Almatyda ushaq apaty oryn alyp, 14 adam qaza tapty. Qaza tapqandardyń arasynda ádilet general-maıory Rústem Esimhanuly Qaıdarov ta boldy.