Almatylyq polıseıler esirtki qoıyp ketýshilerdi anyqtaý jumystaryn kúsheıtti.
Búgingi kúni jahandyq máselelerdiń biri – sıntetıkalyq esirtki. Almatyda esirtki qylmysymen kúresýshiler esirtki zattaryn daıyndap, olardy jasyryn oryndarǵa qoıyp ketý arqyly taratqan adamdardy anyqtaý boıynsha jedel jáne arnaıy is-sharalar júrgizýde, dep habarlaıdy Almaty-akshamy.kz Polisia.kz-ke silteme jasap.
«Sıntetıkalyq esirtkilerdi baılanyssyz ádispen, ınternet arqyly, elektrondy tólemderdi paıdalana otyryp taratý úrdisi saqtalýda. Bıyl qalada 28 iri “qoıyp ketýshi” ustaldy. Olardyń arasynda joǵary oqý oryndarynyń biriniń 19 jastaǵy stýdenti de bar, ony ustaý kezinde odan “Mef 1,0*10”, “Mef 0,5*15” degen jazýy bar býma tabylyp, tárkilendi. İshinde untaqty zaty bar 25 polıetılen túıinshegi boldy. Óz kezeginde ustalǵan azamat “qoıyp ketýshi” bolyp jumys isteıtinin túsindirdi. Tapsyrmany onlaın rejıminde qabyldaǵan. “Jumys berýshiniń” nusqaýy boıynsha ol kúnine orta eseppen 20-25 jerge esirtki jasyrǵan. Jas jigit jumysynyń aqysyn elektrondy túrde alǵan. Qazir aıyptalýshy qamaýda otyr», – dedi Almaty qalalyq polısıa departamenti bastyǵynyń orynbasary Dıdar Ahanov.
Jedel izdestirý sharalarymen qatar qoǵamda nashaqorlyqtyń aldyn alý jáne esirtkige qarsy ımýnıtetti qalyptastyrý jumystary belsendi júrgizilýde.
Polısıa qyzmetkerleri osy jyly eriktilermen birge esirtkiniń taralýy týraly aqparatty qamtıtyn 4 752-den astam graffıtı jazýyn taýyp, joıǵan. Sonymen qatar, qazirgi ýaqytta esirtki quraldaryn, psıhotroptyq zattardy nemese sol tektesterdi, prekýrsorlardy zańsyz jarnamalaý (QR QK-niń 299-baby 1-1-bóligi) deregi boıynsha 7 sotqa deıingi tergeý amaldary júrgizilýde.
Jyl basynan beri qalada esirtkiniń zańsyz aınalymyna qatysty 340 quqyqbuzýshylyq anyqtaldy, onyń ishinde olardy satýdyń 77 deregi bar. 218 kelige jýyq esirtki zattary tárkilenip, zańsyz aınalymǵa jiberilgen joq.