“Mindet. Abyroı. Erlik” respýblıkalyq shyǵarmashylyq baıqaýynda Almaty qalalyq PD jedel basqarý ortalyǵynyń ınspektory Almas Kúntaev ekinshi oryndy ıelendi.
QR İİM-de Qazaqstan polısıasy kúni qarsańynda “Mindet. Abyroı. Erlik” respýblıkalyq kórkemónerpazdar baıqaýy uıymdastyryldy. Oǵan 50-ge jýyq shyǵarmashylyq toptar men jeke oryndaýshylar qatysty, dp habarlaıdy Almaty-akshamy.kz Polisia.kz-ke silteme jasap.
Baıqaýdyń basty taqyryby Qazaqstan halqynyń birligi, Otanǵa degen súıispenshilik, otbasylyq dástúrler men qundylyqtar boldy.
Qazylar alqasy qatysýshylardy birneshe sanat boıynsha baǵalady: ártistik sheberlik, sahnada turý qabileti jáne qoıylymnyń emosıonaldyq quramdas bóligi. Almas Kúntaev “Estradalyq án aıtý. Solo” nomınasıasynda erekshelendi.
«Men mundaı aýqymdaǵy sharalarǵa tórtinshi ret qatysyp otyrmyn. Osydan birneshe jyl buryn Taraz qalasynda birinshi oryn alǵan bolatynmyn. İshki ister organdarynda 2018 jyldan beri qyzmet etip kelemin. Men buryn-sońdy ánshilik, mýzykalyq bilim alǵan emespin, ózimniń jaqsy daýysym men qabiletim bar ekenin otbasylyq ortada eski ándi aıtyp júrgende kezdeısoq baıqadym. Shynymdy aıtsam, bul men úshin naǵyz jańalyq boldy», – deıdi Almas Kúntaev.
Baıqaýdyń basqa laýreattary sıaqty Almas Kúntaevqa dıplom men estelik syılyq tabys etildi.