Eńbek adamy
Erekshe hobbı
Almatyda shaǵyn ǵana qumyrsqa fermasy bar. Onda eldegi qumyrsqalardan bólek, tropıkalyq túrleri de kezdesedi, dep habarlaıdy Almaty-akshamy.kz Qazaqstan.tv-ǵa silteme jasap.
«Bul jerde qazir men qumyrsqalardy zerttep jatyrmyn. Olarda kene bar-joǵyn qarap jatyrmyn», - deıdi Damır Ábdiǵanı.
"Kene - qumyrsqanyń basty jaýy", - deıdi Damır. Ol jándiktiń ústine jabysyp, ishki aǵazasyn ýlaıdy eken. Osynyń saldarynan endi jetilip kele jatqan qumyrsqa kóp uzamaı tirshiligin toqtatady. Jas mırmekologtyń shaǵyn fermasynda qazir qumyrsqanyń onnan astam túri bar.
Damır bul ispen 13 jasynan bastap aınalysa bastaǵan. Alǵashynda balasynyń erekshe qyzyǵýshylyǵyna ata-anasy úzildi-kesildi qarsy bolǵan. Biraq ýaqyt óte kele qoldaý kórsete bastaǵan.
«Qyzyǵýshylyǵy basylyp qalmas úshin balamyzǵa qoldaý kórsetý jaǵyn oılastyrdyq. Úıde jándikterdi asyraýǵa bolmaıdy ǵoı, sol úshin tigin sehymyzdyń bir buryshyn balamyzǵa jaǵdaı jasap, ózine bir qumyrsqamen aınalysatyn burysh jasap berdik», - deıdi Damırdiń anasy Raýshan Ánýarbekova.
Qumyrsqalar sarbazdar, jumysshylar, bala kútýshiler, ıaǵnı hanshaıym bolyp úsh topqa bólinedi. Qumyrsqa ósirý Damır úshin jaı ǵana hobbı emes, óıtkeni sońǵy jyldary osy istiń arqasynda jaqsy tabys taba bastaǵan.
«Qumyrsqalardy ártúrli elderden alamyn. Qytaıdan, Avstralıadan, Evropadan, jáne olardy kóbeıtip, qaıtadan Eýropaǵa, Reseıge satamyn. Sebebi ol - jaqsy tabys kózi. Bir dana qumyrsqany myń dollarǵa satqan kezderim de boldy», - deıdi Damır Ábdiǵanı.
Qumyrsqa satyp alatyn sheteldikter ony kóbine dári-dárimek shyǵyratyn zaýyttarǵa ótkizedi. Sebebi jándikten bólinetin qyshqyldyń emdik qasıeti bar eken. Aıta ketetini, qumyrsqa ósirý - ońaı sharýa emes. Olarǵa qolaıly jaǵdaı jasaý kerek. Mysaly, bólmedegi ylǵaldylyq mólsheri ortasha, al temperatýra +20, 22 gradýstan tómen bolmaýy kerek. Odan bólek kún saıynǵy qoregi bar.
Jalpy, álemde qumyrsqanyń 14 myńdaı túri bar. Damırdiń esebinshe, olardyń 150-ge jýyq túri Qazaqstanda tirshilik etedi.