Almaty qalasyndaǵy Naýryzbaı aýdanyna qarasty №208 mektep-gımnazıasynda bastaýysh synyp oqýshylaryna arnalǵan «Meniń bolashaǵym» atty erekshe shara ótti. İs-sharany uıymdastyrýdaǵy basty maqsat — balalardyń ártúrli mamandyqtar týraly túsinigin keńeıtý, bolashaqqa degen qyzyǵýshylyǵyn oıatý.
Mektep dırektory Gúlbaǵda Adenovanyń aıtýynsha, shara barysynda shamamen 300 oqýshy ózderin túrli kásip ıesi retinde sezinip kórdi.
– Bizdiń oqý ornymyzdyń aýmaǵynda «Mamandyqtar qalashyǵy» formatynda ótken is-sharaǵa ártúrli baǵyttaǵy mamandyq ıeleri qatysty. Balalar dáriger, órt sóndirýshi, polısıa qyzmetkeri, vızajıst, aspaz, tiginshi, shashtaraz syndy mamandardyń jumysyn óz kózderimen kórip, tájirıbe jasap kórdi, – dedi mektep dırektory.
Sharaǵa Almaty qalasyndaǵy tórt kolejdiń ákimshiligi men stýdentteri qonaq retinde kelip, mektep oqýshylaryna sheberlik sabaqtaryn ótkizdi.
Almatylyq qurylys-tehnıkalyq kolejiniń arnaıy pánder oqytýshysy Gúlsım Kerimqulovanyń pikirinshe, bastaýysh synyp oqýshylary úshin bul kezeń bolashaq mamandyqqa degen alǵashqy qadam bolyp tabylady.
– Bul jastaǵy balalardyń qyzyǵýshylyǵy óte joǵary. Olar túrli kásipti baıqap kórip, óz qıalyndaǵy mamandyqty elestete bastaıdy. Vızajıst bolyp bet árleý, aspaz bolyp qamyr ıleý – munyń bári olardyń shyǵarmashylyq qabiletin damytady. Eń bastysy – ómirlik mamandyqty tańdaý emes, bilimge qushtarlyq pen óz-ózine degen senimdilikti qalyptastyrý, – deıdi ustaz.
Aıta keteıik, atalǵan shara Qazaqstan Respýblıkasy Oqý-aǵartý mınıstrliginiń Balalardy qorǵaý kúnine oraı bekitken medıajosparyna sáıkes ótkizildi.
