2024 jyldyń 7-11 naýryz aralyǵynda Almaty qalasynyń oqýshylary Kıprdiń Nıkosıa qalasynda ótken «FIRST Tech Challenge Cyprus 2024» halyqaralyq robototehnıka chempıonatyna qatysty.Týrnırge 18 jergilikti jáne álemniń túkpir-túkpirinen 7 komanda qatysty.
Chempıonatqa Qazaqstannyń namysyn qorǵaýǵa Almaty qalasynan «Sana team» komandasy attanǵan bolatyn. 10-11 synyp oqýshylarynan quralǵan bul komandalardyń quramynda: Bilim Inovasıa Lıseıinen – Tursynǵalı Ádil, Daýletqul Arnar, Akıpbek Osman, Dáýletuly Aldıar, Smaıl Daryn, Pahrıdın Abbas, Ybraı Asylhan, Ashıralın Ilıas jáne M.Bazarbaev atyndaǵy №138 gımnazıasynan – Amankeldi Sholpan bar. Nátıjesinde almatylyq oqýshylar «THINK AWARD» jáne «Winning Alliance AWARD» nomınasıalaryn jeńip, birinshi orynnan kórindi.
«Oqýshylar oıyndarda joǵary kásibılik tanytyp, ınjenerlik daıyndyq sapasymen ǵana emes, sonymen qatar tamasha kommýnıkatıvti daǵdylarymen jáne basqa komandalarmen ózara árekettesýimen de tóreshilerdi tań qaldyrdy. Bizdiń balalar 25 komandanyń ishinde jarqyraǵan kıimderimen, jalyndaǵan kózderimen ǵana emes, machtar kezindegi kóshbasshylyq ustanymdarymen de kózge tústi. Biz favorıtterdiń qatarynda boldyq», - deıdi Almaty qalasy Bilim basqarmasyna qarasty «Almaty daryny» ortalyǵynyń dırektory Gúlnur Kárimǵajy.
Kıprde ótken saıysqa joldamany Qazaqstannan barǵan oqýshylar osy jyldyń qańtar aıynda USTEM Foundation qoǵamdyq qory uıymdastyrǵan Oqý-aǵartý mınıstrliginiń qoldaýymen ótken «Daryn FIRST Championship» respýblıkalyq týrnırinde oljalady.