Jaratylystaný-matematıkalyq baǵyttaǵy pánder boıynsha respýblıkalyq olımpıadanyń qorytyndysy jarıalandy
Jaratylystaný-matematıkalyq baǵyttaǵy pánder boıynsha respýblıkalyq olımpıadanyń qorytyndylary belgili boldy. Bıyl zıatkerlik saıystyń fınaldyq kezeńine elimizdiń túkpir-túkpirinen 955 úzdik mektep oqýshysy ótti. Komandalyq esep boıynsha Almaty qalasynyń qurama komandasy birinshi oryndy ıelenip, «Úzdik olımpıadalyq komanda» ataǵyna ıe boldy, dep habarlaıdy aqshamnews.kz
Olımpıadanyń qorytyndysy boıynsha Gran-prı NIS oqýshylaryna buıyrdy. Birinshi oryn Almaty qalasy men elorda jáne Respýblıkalyq fızıka-matematıka mektebiniń oqýshylaryna berildi. Ekinshi oryndy Pavlodar oblysynyń komandasy ıelense, úshinshi orynǵa Aqtóbe jáne Shyǵys Qazaqstan oblystarynyń oqýshylary ıe boldy.
Olımpıada jeńimpazdarynyń biri, Almaty qalasyndaǵy №126 mamandandyrylǵan lıseıdiń 11-synyp oqýshysy Jan Sharhanov óz áserimen bólisti.
«Men úshin olımpıadaǵa qatysý – tek bilimimdi synaý múmkindigi ǵana emes, sonymen qatar elimizdiń ár óńirinen kelgen bilimge qushtar dostarmen tanysýǵa úlken jol ashty. Almaty komandasynyń bir múshesi bolǵanyma maqtanamyn. Biz kóp eńbektendik. Bolashaqta ǵylymmen aınalysýdy armandaımyn. Osyndaı olımpıadalar – sol armanǵa aparar alǵashqy baspaldaq dep bilemin», – dedi Jan Sharhanov.
Aıta keterligi, Almaty qalasy matematıka jáne geografıa pánderi boıynsha respýblıkalyq olımpıadanyń 325 qatysýshysyn qabyldady. Olımpıada eki kezeńnen turdy: teorıalyq jáne dalalyq týr. Birinshi kezeńde oqýshylar teorıalyq bilimdi tekseretin tapsyrmalardy oryndasa, ekinshi kezeńde kúrdeli esepter men geografıa páni boıynsha dalalyq zertteý jumystaryn júrgizdi.
«Almaty taǵy da joǵary daıyndyq deńgeıin kórsetip, komandalyq esepte birinshi oryndy ıelendi. Bul jeńis – oqýshylar men olardyń ustazdarynyń tynymsyz eńbeginiń nátıjesi. Aıta ketý kerek, Almaty quramasy osy ataqty qatarynan 23 jyl boıy saqtap keledi. Bul – turaqtylyqtyń, júıeli jumystyń jáne joǵary nátıjelerdiń jarqyn kórinisi. Barshańyzdy jeńispen shyn júrekten quttyqtaımyn, aldaǵy ýaqytta da sáttilik tileımin!» – dedi jeńimpazdardy marapattaý rásiminde Almaty qalasy Bilim basqarmasynyń basshysy Saıran Saıfedenov.
Almaty qalasynyń namysyn qorǵaǵan oqýshylar QR Oqý-aǵartý mınıstrliginiń I, II jáne III dárejeli dıplomdarymen, altyn, kúmis jáne qola medaldarmen, sondaı-aq baǵaly syılyqtarmen marapattaldy. Sonymen qatar, erekshe jetistikteri úshin eki oqýshy QR Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵynyń Qurmet gramotalaryn ıelendi.