«Jaqynyńa járdemdes» aksıasy jalǵasýda
Almatyda «Jaqynyńa járdemdes» aksıasy jalǵasyp keledi. Bul bastama «Almaty – bizdiń ortaq úıimiz» qalalyq naýqannyń bir bóligi bolyp tabylady jáne respýblıkalyq «Taza Qazaqstan» baǵdarlamasy aıasynda ótip jatyr.
Jas eriktiler qalanyń túkpir-túkpirinde aýlalardy aralap, erekshe qamqorlyqty qajet etetin jandarǵa – qarttarǵa, ardagerlerge, múmkindigi shekteýli azamattarǵa kómek kórsetip júr. Aýlany tazalaý, úı sharýasyna járdemdesý, emen-jarqyn áńgime – munyń barlyǵyna balalar shyn júrekten kirisken.
Mysaly, №200 mektep-gımnazıasynyń oqýshylary Aqjar shaǵyn aýdanynyń turǵyny Zýre Bekbergenovaǵa kómektesti: qoqys shyǵaryp, aýla sypyryp, aýmaqty retke keltirdi.
— Biz jaı ǵana kelip, kómektestik. Bul qıyn emes, biraq áje úshin úlken kómek. Bizge de qýanysh, – deıdi qatysýshylardyń biri.
Naýryzbaı aýdanynda oqýshylar zeınetker Aızere Jumadilge qol ushyn sozsa, Qaraǵaılyda Áterhan Qasymbekovaǵa kómek kórsetti.
— Qarttarǵa mundaı kómekti kórsetý – basqalarǵa úlgi bolý dep esepteımiz. Qalany taza ustasaq, ómir súrý de jaıly bola túsedi, – deıdi №192 mekteptiń oqýshysy.
Eriktiler qoldaý kórsetkender qatarynda tyl eńbekkeri Vera Mamontova, 94 jastaǵy Ahmetov Álimhan, Zoıa Qydyrova jáne t.b. qala turǵyndary bar. Olar úshin bul aksıa – jaı ǵana aýla tazalyǵy emes, bul – qamqorlyq, nazar aýdarý jáne janyńda seniń jaǵdaıyńa beı-jaı qaramaıtyn jandardyń bar ekenin seziný.
Aksıaǵa Almaty qalasynyń Jumyspen qamtý jáne áleýmettik baǵdarlamalar basqarmasynyń qyzmetkerleri de atsalysty. Sońǵy aptada olar 142 jalǵyz turatyn zeınetker men múmkindigi shekteýli adamǵa kómek kórsetti. Onyń ishinde 74 jaǵdaıda aýlalar tazalanyp, usaq jóndeý jumystary men turmystyq sharýalar atqaryldy.
