Halyqaralyq Jáýtikov olımpıadasynda Almaty Respýblıkalyq fızıka-matematıka mektebiniń (RFMM) oqýshylary joǵary nátıje kórsetip, 17 júlde jeńdi: 2 altyn, 5 kúmis jáne 10 qola medal.
Jalpy komandalyq esepte olar ekinshi jyl qatarynan 3-oryndy ıelenip keledi, dep habarlaıdy aqshamnews.kz.
Bul týraly Óńirlik komýnıkasıalar qyzmetiniń brıfıńinde RFMM oqý jumystary jónindegi dırektordyń orynbasary Nurbaný Kabýlova habarlady.
1972 jyly akademık Orynbek Jáýtikovtiń qoldaýymen qurylǵan bul mektep jarty ǵasyr ishinde myńdaǵan daryndy túlekterdi tárbıelep shyǵardy. Olardyń qatarynda ǵalymdar, memlekettik qaıratkerler men tabysty kásipkerler bar. Búgingi tańda RFMM-niń – úsh fılıaly bar, Almaty, Astana jáne Oral qalalarynda, sondaı-aq álemniń jetekshi joǵary oqý oryndaryna túsetin júzdegen túlekterimen maqtana alady.
Oqý baǵdarlamasy fızıka men matematıkany tereńdetip oqytýǵa baǵyttalǵan, sonymen qatar ınformatıka, baǵdarlamalaý, jaratylystaný jáne gýmanıtarlyq pánderdi de qamtıdy.
«Qala ákimi Erbolat Dosaev ta osy mekteptiń túlegi. Onyń basshylyǵymen qalada birneshe ınfraqurylymdyq joba júzege asyrylýda. RFMM túlegi retinde ol qalany damytý men turǵyndardyń ál-aýqatyn jaqsartýǵa belsendi at salysýda», – dedi spıker.
Mektepterde olımpıadaǵa daıyndyqqa erekshe nazar aýdarylady. Oqýshylar olımpıadalyq rezerv mektepterinde oqyp, halyqaralyq jazǵy lagerlerge qatysýǵa jáne RFMM-ge qabyldaý úshin synaq testilerin tapsyrýǵa múmkindik alady.
«Biz oqýshylardyń jan-jaqty damýyna jaǵdaı jasaıtynymyzdy maqtan tutamyz. Bıyl 7-synypqa qabyldaý úshin jańa formattaǵy emtıhan engizdik, onda matematıka boıynsha bilim ǵana emes, logıkalyq oılaý da eskeriledi», – dep atap ótti Kabýlova.
Sońǵy jyldary RFMM-ǵa túsý konkýrsy aıtarlyqtaı ósti. 2024 jyly 7000 ótinim tússe, bıyl 3500 úmitker tirkelip úlgerdi. 3 sáýirge deıin ótinim sanynyń aıtarlyqtaı artýy kútilýde.