Olar eki júlde jeńip aldy.
Jarysqa 11 elden barlyǵy 400-ge jýyq bala qatysqan, dep habarlaıdy Almaty-akshamy.kz
Almatylyq oqýshylar Aýstralıada robototehnıkadan ótken chempıonatta eki júldeni jeńip aldy. Qazaqstannyń «Sana Team» quramasy FIRST Tech Challenge kategorıasy boıynsha Asia Pacific Open Championship halyqaralyq chempıonatynyń jeńimpazy atandy.
Elimizdiń atynan «Bilim-ınnovasıa» lıseıi men Respýblıkalyq fızıka-matematıka mektebiniń 11-synyp oqýshylary: Daryn Smaıyl, Arnar Dáýletqul, Ádil Tursynǵalı, Abbas Pahrıdın, Osman Akıpbek, Asylhan Ybyraı, İlıas Áshiralın, Aldıar Dáýletuly, Janaıym Sabyrjan, Ǵazıza Kýngojına qatysty.
Fınaldyq kezdesýde qazaqstandyq mektep oqýshylary BAÁ komandasymen odaqtasyp, jeńiske jetý úshin kúresti. Eki kúnniń qorytyndysy boıynsha oqýshylar eki marapatqa ıe boldy: Finalist Alliance Captain jáne «Motivate Award» nomınasıasynda birinshi oryn.
«Alǵashqy eki kúnde biz jeńilissiz alǵa shyqtyq. Oıynnyń sońǵy kúni qıynyraq boldy, biraq fınalǵa óttik. Biz robot oıynynda jaqsy óner kórsetip qana qoımaı, qazylar alqasynyń aldynda óz portfolıomyzdy qorǵaı alǵanymyzǵa óte qýanyshtymyz»,-dedi komanda kapıtany Daryn Smaıl.