Qosymshany Google Play jáne App Store arqyly júktep alýǵa bolady.
Almaty qalasynyń №15 gımnazıasynyń oqýshysy Tımýr Qyrbasov ólkeniń tarıhyn zertteýge arnalǵan erekshe qosymsha oılap tapty, dep habarlaıdy Almaty-akshamy.kz
Mınıstrliktiń málimetinshe, baǵdarlama kóshe nemese aıaldamaǵa jaqyndaǵan kezde avtomatty túrde nysan týraly paıdaly, tanymdyq tarıhı aqparat beredi.
"Joba "Meniń qalamnyń, elimniń tarıhyn zertteýde ICT-tehnologıalardy qoldaný" dep atalady. Bul buǵan deıin ózim daıyndaǵan eki shaǵyn qosymshanyń biriktirilgen nusqasy. Birinshisi - qoǵamdyq kóliktegi eskertý júıesin jańartý arqyly qala tarıhyn tanystyrý. Bul ıdeıa – qaladaǵy qoǵamdyq kólikterdegi dybysty habarlamalar arqyly tarıhı aqparatty qosý", – deıdi Tımýr Qyrbasov.
Ekinshisi "AIALDAMA" mobıldi qosymshasy eken.
"Men ázirlegen mobıldi qosymshany paıdalanýshy kósheni kesip ótken sátte kóshege qatysty nemese sol jerdegi nysandar týraly aqparat beredi. Jobanyń maqsaty – oqýshylarǵa el tarıhyn kúndelikti ómirde zertteýge kómektesý", – deıdi jas talapker.
Tımýr tarıhty bilý óte mańyzdy dep sanaıdy. Buǵan qosa ol úsh jobasynyń avtorlyq quqyǵyn qorǵaǵan. Sońǵy úsh jylda halyqaralyq jáne respýblıkalyq ǵylymı jobalardyń júldelerin ıelendi. Al 2022 jylǵy 1 maýsymda Tımýr "Almaty BalaFest" qalalyq festıvalinde Memleket basshysynyń nusqaýshysy bolǵan.