40-tan astam eldiń oqýshylary qatysqan aǵylshyn tili boıynsha halyqaralyq KGL Contest (Kangaroo Global Linguistics) olımpıadasynyń fınaly sensasıalyq nátıjemen aıaqtaldy.
Bul jarysqa alǵash ret qatysqan Qazaqstan komandasy 1-oryndy ıelendi! Altyn medal ıegeri — Almaty qalasyndaǵy №23 mektep-gımnazıasynyń oqýshysy Darıa Nasımýllına boldy, - dep habarlaıdy Aqshamnews.kz.
Darıa Nasımýllına shet tilin meńgerýdiń eń joǵary deńgeıi – B2 boıynsha birinshi oryndy ıelendi.
İrikteý úsh kezeńnen turdy: eki ulttyq kezeńnen (Stage I jáne Stage II) jáne bir halyqaralyq kezeńnen – fınaldan (Global Event). 2025 jyly fınal 2–4 qazan aralyǵynda Grekıanyń Salonıkı qalasynda ótti.
Olımpıadanyń birinshi kezeńi álemniń túkpir-túkpirinde 2025 jylǵy 15 aqpanda ótti. Aıazdy aýa raıy men júzdegen shaqyrymdyq qashyqtyqqa qaramastan, ata-analar men muǵalimderdiń tabandylyǵynyń arqasynda 2691 oqýshy testileý ótkizý úshin belgilengen oblys ortalyqtary men qalalarǵa kelip qatysty. Bastapqy kezeń Qazaqstannyń 12 óńirin, sonyń ishinde respýblıkalyq mańyzy bar úsh qalany qamtydy.
Barlyq úderis qatań túrde tirkelip otyrdy: taratpa materıaldardy ashý ýaqyty, test tapsyrý taımıngi jáne qatysýshylardyń jaýap paraqtaryn mórleý tártibi naqty baqylandy. Ár óńirge bekitilgen sýpervızorlar myńdaǵan qorytyndy faıldardy sıfrlandyryp, derekterdi bas keńse platformasy arqyly ýaqytyly jiberip otyrdy. Budan keıin KGL Contest ıntellektýaldy júıesi ár qatysýshynyń jaýaptaryna sáıkes upaılardy avtomatty túrde eseptedi.
Nátıjesinde 530 oqýshy birinshi irikteý kezeńinen ótti. Ekinshi týrǵa ótý úshin ótý baly múmkin bolatyn eń joǵary upaıdyń 90%-yn qurady.
Aǵylshyn tilin bilýge arnalǵan olımpıadanyń ekinshi kezeńi 2025 jyldyń 15 naýryzynda ótkizildi. Eki aıǵa sozylǵan shet tilin meńgerý synaǵy elge Pre-A1, A1, A2, B1, B2 deńgeıleriniń barlyǵy boıynsha joǵary nátıjeler ákeldi.
Osy olımpıadaǵa otandyq mektepterdiń qatysý bastamashysy bolǵan EDU Stream halyqaralyq til akademıasy tórt deńgeı boıynsha birinshi oryn ıelerin saltanatty túrde quttyqtap, balalardyń Grekıada ótetin fınalǵa qatysýy úshin ushaq bıletterin óz esebinen qamtamasyz etti.
Global Event kezeńinde qazaqstandyq oqýshylardyń jeńisin eshkim kútpegen edi.
EDU Stream akademıasymen jáne ekinshi bastamashy – Express Publishing baspasymen birlese otyryp, Almaty qalasynyń Bilim basqarmasy megapolıs oqýshylarynyń olımpıadaǵa qatysýyn uıymdastyrdy.
«Meniń deńgeıim — B2 boıynsha jeńimpazdardy jarıalap jatqanda, birinshi oryndy alamyn dep oılamadym. Úshinshi, ary ketse ekinshi oryndy ıelenermin dep kúttim. Al 2 jáne 3 oryn alǵan qyzdardyń esimderi atalǵanda, men ishteı jeńispen qoshtasyp, kóńilim túsip otyrdym. Biraq ekrannan óz atym men tegimdi birinshi orynda kórgen sátte, “bul bir qaljyń shyǵar” dep oıladym! Qoldarym dirildep, sahnaǵa shyqqanda fınalda jeńiske jetkenime sheksiz qýandym», – dep áserimen bólisti aǵylshyn tili boıynsha halyqaralyq KGL Contest-2025 olımpıadasynyń B2 deńgeıi boıynsha jeńimpazy Darıa Nasımýllına.
«Men óz oqýshym — Darıanyń jetistigimen qatty maqtanamyn. Ol shet tilin meńgerýdiń eń joǵary deńgeıinde eń joǵary upaı jınady. Bul — búkil elimizdiń jetistigi! Osy sátti paıdalana otyryp, barlyq ata-analar men áriptesterime aıtarym — balalaryńyzǵa senińizder, olardy qoldańyzdar, júrekterine úmit pen senim otyn jaǵaıyq! Óıtkeni elimizdiń bolashaǵy — aqyldy da abyroıly urpaqtyń qolynda», – dedi Almaty qalasyndaǵy №23 mektep-gımnazıasynyń aǵylshyn tili páni muǵalimi Saǵynysh Raıbekova.
Qazaqstan atynan qatysqan taǵy bir almatylyq oqýshy – №39 lıseıdiń shákirti Tańat Tólenbaı aǵylshyn tili boıynsha B1 deńgeıinde joǵary nátıje kórsetip, qatysý sertıfıkatyna ıe boldy.
Darıa men Tańat, sondaı-aq Astana qalasyndaǵy №82 «Daryn» lıseıiniń oqýshysy Álı Alpysbaı (A2 deńgeıi) jáne Qyzylorda qalasyndaǵy №197 orta mekteptiń oqýshysy Jasmına Baqytjan (A1 deńgeıi) óz jetistikterimen shet tilderi boıynsha halyqaralyq olımpıadany uıymdastyrýshy ITA uıymynyń ókilderin tańǵaldyrdy.
B2 deńgeıi boıynsha fınalda 1-oryn alǵany úshin Darıa Nasımýllına ITA uıymy tarapynan 500 AQSH dollary kóleminde aqshalaı sertıfıkatpen marapattaldy. Barlyq qatysýshylar KGL Contest olımpıadasynyń medaldarymen, syılyqtarymen jáne sertıfıkattarymen marapattaldy.
«Qazaqstannan kelgen oqýshylar bizdi qatty tańǵaldyrdy, óıtkeni sizderdiń elińiz KGL Contest olımpıadasyna alǵash ret qatysty. Alaıda birden fınalda jeńiske jetý — mundaı jetistikke álemniń eshbir eli buǵan deıin qol jetkizgen emes! Biz sizderdiń olımpıadaǵa belsendi qatysýlaryńyz dástúrge aınalady dep úmittenemiz», – dedi ITA uıymynyń bas dırektory Maıkl Kartı.
KGL Contest – bul aǵylshyn tilin shet tili retinde úırenip júrgen 8 ben 17 jas aralyǵyndaǵy oqýshylarǵa arnalǵan halyqaralyq olımpıada.
KGL olımpıadasynyń basty ereksheligi – onyń kúrdelilik deńgeıleri Pre-A1, A1, A2, B1, B2, ıaǵnı CEFR (Common European Framework of Reference) halyqaralyq shkalasyna sáıkes keledi.
Bul baıqaýdy International Testing Authority (ITA) uıymy uıymdastyrady jáne onyń maqsaty – oqýshylarǵa ózderiniń tildik daǵdylaryn qyzyqty ári shabyttandyratyn ortada kórsetýge múmkindik berý.
Olımpıada 2017 jyly qurylǵan jáne jyl saıyn álemniń 40-tan astam elinde ótkiziledi. Bul baıqaý álem oqýshylarynyń aǵylshyn tilin meńgerý deńgeıin shynaıy túrde kórsetetin bedeldi halyqaralyq jarys bolyp tabylady.