Almatylyq dárigerler moıny synǵan adamnyń ómirin arashalap qaldy.
№4 QKA dárigerleri moıny synǵan er adamdy múgedektikten aman alyp qaldy. Dárigerler jańa ádiske júginip, aýrýhanada buryn-sońdy jasalmaǵan ota jasady, dep habarlaıdy Almaty-akshamy.kz.
48 jastaǵy naýqas aýrýhanaǵa moıyn omyrtqasy qatty aýyrǵanyna shaǵymdanyp tústi. Aýyrǵany sonsha, ol tipti basyn bura almaı qaldy. Tekserýden keıin naýqas shuǵyl túrde neırohırýrgıa bólimshesine jatqyzyldy.
Naýqas aýrýhanaǵa jatqyzylǵannan keıingi kúni onyń omyrtqasyna tehnıkalyq kúrdeli ári sırek ota jasaldy.
Jasalǵan hırýrgıalyq ota tis tárizdi ósindini burandamen transdentaldy osteosıntezdeý dep atalady. Naýqasty múgedektikten qutqarý jáne onyń ómir súrý sapasyn saqtaý úshin №4 QKA neırohırýrg mamandary emdeýdiń bul ádisin alǵash ret qoldanýdy uıǵardy.
Pılottyq otany neırohırýrg Aıtmuhanov Tımýr Muratuly jasady.
«Moıyn omyrtqasy 7 omyrtqadan turady. Birinshi jáne ekinshi omyrtqa kóteretin fýnksıonaldyq júktemege baılanysty túbegeıli erekshe mánge ıe. Birinshi omyrtqa – atlant, ekinshi omyrtqa – aksıs. Olar bir-birimen S2 omyrtqasynyń tis tárizdi ósindisi men atlanttyń aldyńǵy doǵasynan túziletin Krúvele býyny arqyly baılanysady. Omyrtqanyń bul segmentiniń mańyzdylyǵy, túrli avtorlardyń pikirinshe, bas qozǵalysynyń 50-den 70%-na deıin osy bólimde oryn alatynynda. Biraq tis tárizdi ósindiniń synýy kezinde bul fýnksıa zardap shegedi», - deıdi dáriger Tımýr Aıtmuhanov.
Ota nátıjesinde naýqas palataǵa aýystyryldy, moıyn omyrtqasyndaǵy qozǵalystar qalpyna keltirildi.
Neırohırýrgtar ımplanttyń jumysyn ornatqannan keıin birinshi kúni, bir aıdan keıin, úsh aıdan keıin jáne alty aıdan keıin tekseredi. Bul ádis aýrýhanaǵa jatqyzý uzaqtyǵyn qysqartýmen qatar, naýqastyń múgedek bolý qaýpin de kúrt tómendetedi.