Bıylǵy jyldyń 10 aıynda ońtústik astanada mindetti áleýmettik medısınalyq saqtandyrý esebinen 700 myńǵa jýyq medısınalyq ońaltý qyzmeti kórsetildi. Oǵan Medısınalyq saqtandyrý qory tarapynan 5,8 mlrd teńge tólendi. Bul týraly búgingi brıfıńte MSQ Almaty fılıalynyń dırektory Tileýhan Ábildaev aıtty, dep habarlaıdy Almaty-akshamy.kz.
Aıtýynsha, medısınalyq saqtandyrý ońaltý men pasıentterdiń densaýlyǵyn qalpyna keltirýge baǵyttalǵan em-sharalardyń qoljetimdiligin arttyrýǵa múmkindik berip otyr.
«MÁMS engizilgeli beri medısınalyq reabılıtasıaǵa bólinetin qarjy kólemi 13 ese artty. Salystyrar bolsaq, 2019 jyly ońaltý qyzmetine bar-joǵy 600 mln teńge jumsalǵan bolsa, 2022 jyly reabılıtasıalyq qyzmetterge 7,5 mlrd teńge qarastyrylǵan», - dedi Tileýhan Ábildaev.
Qazirgi tańda densaýlyǵynda týabitti aqaýy bar, ınsýlt nemese ınfarkt saldarynan mıdaǵy qan aınalymy buzylǵan, omyrtqasyna, býyndaryna nemese kardıohırýrgıalyq ota jasatqan, qımyl-qozǵalys apparaty zaqymdanǵan pasıentter medısınalyq ońaltýdan óte alady. MÁMS arqyly kórsetiletin emniń bul túri emhanalar men aýrýhanalarda ǵana emes, jeke menshik klınıkalarda, reabılıtasıalyq jáne sporttyq-ońaltý keshenderi men sanatorıılerde de kórsetiledi.
«Qor barlyq profılder, sonyń ishinde ońaltý qyzmeti boıynsha jańa klınıkalardy jumysqa tartýmen turaqty túrde aınalysady. Bul emdeý mekemelerindegi kezekti azaıtyp, pasıentterdiń medısınalyq kómekti paıdalaný quqyǵyn qamtamasyz etýge kómektesedi. Bıyl Almaty qalasynda 75 medısına uıymy reabılıtasıa profıli boıynsha qyzmet kórsetip jatyr. Olardyń bári Qormen kelesimshart bekitken», - dedi Tileýhan Ábildaev.
Bir aıta keterligi, pasıent reabılıtasıadan ótetin klınıkany óz betinshe tańdaı alady. Olardyń naqty tizimimen Qordyń fms.kz saıty arqyly tanysýǵa bolady. Joldama aýrýhananyń nemese emhananyń mýltıdısıplınarlyq komandasynyń qorytyndysy negizinde beriledi.