İrikteý kezeńine 112 bala qatysty, onyń 59-y jartylaı fınalǵa ótti
Astana Piano Passion respýblıkalyq jas pıanıser baıqaýynyń jeńimpazdary marapattaldy. Konkýrsqa 7 - 17 jas aralyǵyndaǵy jas talanttar qatysty, dep habarlaıdy Almaty-akshamy.kz.
Baıqaý qorytyndysy boıynsha Almaty qalasynan kelgen 15 jastaǵy Juldyz Erjeńis Astana Piano Passion gran-prı ıegeri atanyp, 3 mln teńge jeńip aldy. Sondaı-aq oǵan «Astana Opera» teatrynyń kameralyq zalynda jeke konsert uıymdastyrýǵa nemese álemge áıgili maestro Alan Bóribaevtiń jetekshiligimen sımfonıalyq konsertke qatysýǵa múmkindik berildi.
«Mádenıet salasyndaǵy mańyzdy baǵyttardyń biri – elimizdegi jas talanttardy qoldaý, olardyń shyǵarmashylyǵyna jol ashý. Búgin jeńimpaz atanǵan ul-qyzdarymyz bolashaqta álem sahnalaryn baǵyndyra alatynyna senimdimin. Aldaǵy ýaqytta is-shara aýqymyn budan da keńeıtýimiz kerek. Sebebi mýzykada shekara bolmaıdy, kez kelgen áýenniń tili barsha halyqqa ortaq. Búgin marapatqa ıe bolǵan jeńimpazdardy shyn júrekten quttyqtaımyn», - dedi Mádenıet jáne sport mınıstri Dáýren Abaev gala-konsertte.
İrikteý kezeńine 112 bala qatysty, onyń 59-y jartylaı fınalǵa ótti. Qazylar alqasy elimizdiń barlyq oblys ortalyqtaryna baryp irikteý týrlaryn jáne balalarǵa arnalǵan sheberlik sabaqtaryn ótkizdi. Qazylar alqasy quramynda elimizdiń kórnekti mádenıet jáne óner qaıratkerleri, sondaı-aq fortepıano óneri salasyndaǵy halyqaralyq baıqaýlardyń laýreattary boldy.
Baıqaý qorytyndysy boıynsha jas ereksheligine sáıkes úsh top arasynda I, II jáne III oryn ıegerleri anyqtaldy. Úzdik mýzykanttarǵa aqshalaı sertıfıkattar tabystaldy.