Almatyda jasóspirimderge arnalǵan ýrbanıstıka klýby ashyldy.
Joba fakúltatıvtik negizde jumys isteıdi. Jasóspirimder jeti aı boıy tájirıbeli mamandardan dáris tyńdap, semınarlarǵa qatysady, sondaı-aq ózderi zertteý júrgizedi, dep habarlaıdy Almaty-akshamy.kz 24.kz-ke silteme jasap.
Jánıa men Jibek úshin ýrbanıstıka klýby qalaǵa paıdaly ıdeıalardy júzege asyrýǵa múmkindik beretin orynǵa aınaldy. Olar Almatynyń eskertkishteri, ınstallásıalary men qabyrǵa sýretteri kórsetilgen onlaın karta jasady. Mádenıet nysandaryn bassańyz boldy, karta olardyń tarıhy týraly málimet beredi. Qyzdar úshin bul birinshi tájirıbe, sondyqtan olarǵa kásibı mamandar kómektesti. Kartany ázirleýge bir apta ýaqyt ketken.
«Bizdiń negizgi oıymyz - adamdarǵa kóshe óneri týraly, óz aımaǵynda qandaı art-jobalar, ınstallásıalar bar ekeni týraly jetkizý. Mysaly, qabyrǵa sýretteri, olardyń tarıhy qala turǵyndary men qonaqtary úshin qyzyq dep oılaımyz», - deıdi URBANITARIUM klýbynyń múshesi Jibek Baızýlına.
Al Dáýlet esimdi klýb múshesin qaladaǵy kólik qozǵalysy qatty mazalaıdy. Bul - megapolıstiń negizgi ekologıalyq problemalarynyń biri, - deıdi jas ýrbanıst. Aldaǵy ýaqytta ol kólik keptelisin barynsha azaıtýdyń ońtaıly sheshimderin tabýdy josparlap otyr. Aıtýynsha, jańa joba ýaqytty únemdep, qala ekonomıkasyn jaqsartýǵa septigin tıgizedi. Maqsatyna jetý úshin tálimgerlermen birlesip, karta qurastyrýdy qolǵa aldy.
«Biz aýdanymyzdyń 3D modelin jasadyq, bul belgili bir aýmaqtar. Iaǵnı modelde saýda men bıznesti, avtokólik joldaryn alyp tastaýǵa bolatyn jerler kórsetildi, ornyna jaıaý júrginshiler aleıasyn jasaýǵa bolady», - deıdi URBANITARIUM klýbynyń múshesi Dáýlet Orman.
Urbanitarium klýbyndaǵy jas ýrbanısterdiń qyzyqty ıdeıalary kóp. Olardyń barlyǵy kreatıvti jáne qalalyq ortany jaqsartýǵa baǵyttalǵan. Búginde klýbta elýden astam mektep oqýshysy bar. Óz qalasyn súıetin jáne ony jaqsartýǵa nıetti kez kelgen oqýshy klýbqa múshe bola alady.
«Jasóspirimder men balalar da qala turǵyny bolyp esepteledi. Sondyqtan olardyń pikirine qulaq asqan jón. Sonymen qatar olardyń qazirden bastap ıgi isterge aralasyp, qundylyqtardy boılaryna sińirgenderi durys», - deıdi URBAN FORUM KAZAKHSTAN qoǵamdyq qorynyń teń quryltaıshysy Ásel Esjanova.
Úıirmedegi sabaqtar aptasyna bir ret qana ótedi. Biraq soǵan qaramastan qatysýshylar qazirdiń ózinde mańyzdy zertteýlermen aınalysýda. Jasóspirimder ózenderdi zerttep, sýdyń lastaný deńgeıin ólsheýdi úırenýde.