Bilimdiler saıysy onlaın formatta uıymdastyrylǵan.
Úshinshi ret qatarynan halyqaralyq Jáýtikov olımpıadasynyń altyn medalin Almatydaǵy fızıka-matematıka baǵytyndaǵy zıatkerlik mekteptiń oqýshysy Taır Satýbaldın jeńip alyp, matematıkter arasynda úzdik atandy, dep habarlaıdy Almaty-akshamy.kz QazAqparatqa silteme jasap.
Kóptegen olımpıadalardyń jeńimpazy men júldegeri atanyp júrgen Taır 5 jasynan esep shyǵara bilgen. Bahyt Arhıpqyzy esimdi kútýshisi kishkentaı Taırdyń matematıkaǵa degen súıispenshiligin oıatqan. Al mektep tabaldyryǵyn attaǵan soń, matematıka eń qyzyqty pánderiniń birine aınalǵan.
Daryndy bala 7-synyptan bastap halyqaralyq jarystarda baq synaǵan. Búginde qorjynynda 20-ǵa jýyq jeńisi bar. Byltyr Taırǵa Astana IT ýnıversıteti tegin oqýǵa grant usynsa, búginde Hong Kong University of Science and Technology joǵarǵy oqý ornynda bilim alýǵa múmkindigi bar. Jalpy, ózi AQSH-taǵy Massachusetts Institute of Technology ýnıversıtetinde oqýdy kózdep otyr. Onyń aıtýynsha, sol oqý ornynda bilim alýyna baryn salmaq.
«Sózdiń shyny kerek, men halyqaralyq jarysqa daıyndalmaı baryp, altyn medal ıegeri atandym. Maǵan I kezeń II kezeńge qaraǵanda qıyndaý soqty. Máselen, birinshi týrǵa 4,5 saǵat ýaqytym ketse, ekinshi týrǵa 3 saǵat jumsadym. Endi aldaǵy ómirimdi joǵary matematıkamen baılanystyrǵym keledi. Josparlar kóp», - deıdi Taır Satýbaldın.
Halyqaralyq Jáýtikov olımpıadasy - ınformatıka, fızıka jáne matematıka pánderi boıynsha 10-12 synyp oqýshylaryna arnalǵan jyl saıynǵy jarys. Bıyl tartysty dodaǵa álemniń 21 elinen 1178 oqýshy qatysqan. Jalpy, olımpıada Qazaqstanda 2005 jyldan beri ótkizilip keledi.
Onlaın formatta ekinshi ret uıymdastyrylyp otyr.