Ońtústik astanadaǵy Ortalyq qalalyq klınıkalyq aýrýhanaǵa asa aýyr halde 68 jastaǵy er adam jetkizildi.
Teksere kele dárigerler ateroskleroz saldarynan onyń aıaǵyndaǵy kúretamyrlary zaqymdanǵanyn, sandaǵy kúretamyrda qan aınalysy buzylǵanyn anyqtady, dep habarlaıdy Almaty-akshamy.kz.
Sonymen qatar, aıaq tinderine múlde qan barmaı qalǵandyqtan bashpaılary jansyzdanyp, gangrena paıda bolǵan pasıentke aıaqtyń 4-deńgeıli ıshemıasy degen dıagnoz qoıyldy.
Ádette, mundaı jaǵdaılardyń 35 prosentinde aıaqty jambastan tómen kesip tastaýǵa týra kelse, 18% jaǵdaıda sońy adam ólimimen aıaqtalady. Aıaǵy kesilgen pasıentterdiń 9-21%-i ómirmen qosh aıtyssa, 45%-y orta eseppen bes-aq jyl ómir súredi. Qalǵan pasıentter ómir boıy múgedek arbaǵa tańylady.
Ortalyq qalalyq klınıkalyq aýrýhana dárigerleri ınovasıalyq ota jasap, endovaskýlárly kateterlik ádispen perıferıalyq kúretamyrlardaǵy túıinshekterdi alyp tastady. Operasıa mindetti áleýmettik medısınalyq saqtandyrý qarajaty esebinen jasaldy.
Júrek-qan tamyrlary aýrýlaryn ınovasıalyq emdeý tásili rentgendi ota zalynda naýqasty uıyqtatpaı, jergilikti jansyzdandyrý arqyly júrgiziledi.
«Bir saǵatqa sozylǵan operasıa sátti aıaqtaldy. Biz HawkOne apparatynyń kómegimen endovaskýlárly aterektomıa dep atalatyn ota jasadyq. Bul operasıadan keıin pasıent tez aıyǵady, uzaq ýaqyt boıy stasıonarda jatyp emdelý qajet bolmaıdy. Álbette, jańa quraldar men qondyrǵylar jumysty jeńildetip jatyr. Bizdiń aýrýhana da zaman kóshinen qalmaı damyp keledi. Bul adam ómirin saqtap qalý múmkindigin arttyryp, qan tamyryndaǵy kóptegen patologıalardy emdeýge kómektesedi», - deıdi qan-tamyr hırýrgi Sultan Ilıev.
Tamyr ishi aterektomıasy magıstraldy qan tamyrlary aterosklerozben zaqymdanǵan naýqastardy emdeýdegi eń tıimdi tásilderdiń biri. Ol endovaskýlárlyq ádisterdi tamyrdyń tarylǵan ári qatty zaqymdanǵan tustarynda da paıdalanýǵa múmkindik beredi.