Qymbat operasıa mindetti áleýmettik medısınalyq saqtandyrý qarajaty esebinen jasaldy.
Qalqamandaǵy №7 qalalyq klınıkalyq aýrýhana dárigerleri baýyryna úlken kısta shyqqan áıelge ota jasady, dep habarlaıdy Almaty-akshamy.kz aýrýhananyń baspasóz qyzmetine silteme jasap.
Almaty oblysynyń Qarasaı aýdanynda turatyn áıel óskindi alyp tastaý úshin Almatydaǵy №7 qalalyq klınıkalyq aýrýhana dárigerlerine júgingen. Aıtýynsha, dıagnoz qoıylǵaly beri bir jyl ótken. Osy ýaqyt ishinde kısta birneshe esege ulǵaıypty.
«Sońǵy jyldary oń jaq qabyrǵamnyń tómengi jaǵy únemi aýyryp mazamdy alatyn. Dárigerler teksere kele, ota jasaý qajettigin aıtty. Operasıany portalǵa turyp, MÁMS arqyly qalada jasatýǵa bolatynyn da solardan bildim», - deıdi pasıent.
Esterińizge sala ketsek, medısınalyq qyzmetterge, sonyń ishinde MÁMS paketine kiretin operasıalarǵa joldamany jergilikti emhana dárigerleri beredi. Pasıent osy tártippen tıisti analızderdi tapsyryp, Almatydaǵy №7 aýrýhanaǵa joldama alypty.
«Baýyrdaǵy óskinge laparoskopıalyq fenestrasıa jasaldy. Bul operasıa kıstany kishkene tilip, ishindegi suıyqtyqty tolyǵymen alyp tastaýǵa múmkindik beredi. Jalpy, laparoskopıalyq tehnologıalar emdeý prosesin tezdetip, pasıenttiń otadan keıin tez qalpyna kelýine múmkindik beredi», - deıdi ota jasaýshy maman, №1 hırýrgıa bóliminiń meńgerýshisi Nurlan Máýlenov.
Jetinshi aýrýhananyń sheteldik klınıkalarda tájirıbe jınaqtaǵan talantty hırýrgtteri men anestızıologtarynyń sheberliginiń arqasynda kúrdeli ota sátti ótti. Qazir pasıent aýrýhanadan shyǵyp, ambýlatorlyq baqylaýǵa alyndy.
Medısınalyq saqtandyrý qorynyń málimetinshe, saqtandyrylǵan azamattar, sonyń ishinde ózge aımaqtardyń turǵyndary da qalalyq stasıonarlarda jatyp emdele alady. Ol úshin óz emhanasy arqyly «Aýrýhanaǵa jatqyzý búrosyna» tirkelip, joldama alý qajet.