TikTok platformasy Oqý-aǵartý mınıstrliginiń qoldaýymen ótkizilgen kezekti #Qazaqstanmuǵalimderi baıqaýynyń qorytyndysyn shyǵardy, dep habarlaıdy Almaty-akshamy.kz.
«TikTok-pen birge júzege asyrylǵan jobamyzdyń arqasynda elimizdegi pedagogter jastarmen, túrli býyndaǵy ınternet qoldanyshýlarymen birge óz bilimderin shyǵarmashylyq turǵyda ári qyzyqty úlgide bólisý múmkindigin aldy. Ustazdardyń da shet qalmaı, ınternet platformalaryn ıgilikke paıdalanyp, ǵylym men mektep pánderin keńinen nasıhattaýy qýantady. #Qazaqstanmuǵalimderi bastamasynyń maqsaty – pedagogterdi oqytýdyń jańa shyǵarmashylyq ádisterin ashýǵa shabyttandyrý, sabaq oqytý qyzyqty ári tartymdy ekenin kórsetý jáne elimizdegi bilim berý mazmunyna qyzyǵýshylyqty arttyrý», - dedi QR Oqý-aǵartý mınıstrliginiń baspasóz hatshysy Mereke Amangeldiqyzy.
Jobanyń resmı ambassadorlary hımık Ulan Úsenov @wannabeteacher, matematık Danıar Seńgirbaı @aks.dani, ótken baıqaýdyń jeńimpazy Bekbolat Komolov @the_bekbolat01, sondaı-aq muǵalimder komandasynyń ókili Narıman Qarabalın @jump2mars boldy.
Baıqaýǵa elimizdiń ár óńirinen muǵalimder qatysyp, gýmanıtarlyq, jaratylystaný jáne tehnıkalyq pánder boıynsha qysqa formattaǵy beınerolıkterin jarıalady. Qatysýshylar jobanyń resmı heshtegterin #Qazaqstanmuǵalimderi men #ÝchıteláKazahstana paıdalandy, sonyń arqasynda qaralym sany 800 mıllıonnan asyp tústi.
Kelesi muǵalimder baıqaýdyń jeńimpazdary atandy:
1. «TıkTok muǵalimi 2023»
Bul sanatta belgili bir pán boıynsha aqparat naqty jáne kreatıvti kórsetilgen beınerolık baǵalandy. Jeńimpazy - Almatydaǵy fızıka pániniń muǵalimi Haıdar Mýrzahmetov @neverhaid atandy. Ol qazaqstandyq toptyń tanymal ánin oryndap, belgili fızık Isaak Núton men onyń zańdaryna arnap sándi beınebaıan túsirdi. Haıdar TikTok-ty fızıka syndy kúrdeli pándi de jalyqtyrmaı, shyǵarmashylyq turǵyda kórsetýge bolatyn edutainment-formaty úshin minsiz platforma ekenin taǵy da dáleldedi.
2. «TıkTok oqytýshysy 2023»
Bul nomınasıa boıynsha ýnıversıtet oqytýshylary arasynan eń kreatıvti beınerolık usynǵan avtor jeńimpaz atandy. Jeńisti almatylyq robototehnıka pániniń muǵalimi Hamza Dáýletbek @khamza_d ıelendi. Ol eki mınýttyq beınerolıkte Arduino platformasynda robotty óz betinshe qurastyrý jolyn anyq túsindire aldy.
3. «Muǵalim-jańalyq»
Baıqaý aıasynda jasalǵan beınerolıkteri eń kóp qaralǵan muǵalim «Jańalyq» dep esepteldi. Beınebaıandary 8 mıllıonnan astam qaralym jınaǵan Jetisý oblysy, Alakól aýdany, Dostyq aýylynyń turǵyny, orys tili men ádebıeti pániniń muǵalimi Botagóz Omarova @botagozomarova2 jeńimpaz atandy. Onyń erejelerdi qarapaıym túrde túsindirgen pozıtıvti beınebaıany myńdaǵan qaralymdy jınaýda. Eń tanymal beınerolık qazirdiń ózinde 3 mıllıonnan astam ret qaraldy.
4. «Úzdik beınerolık»
Bul nomınasıada TikTok-ta eń kóp qaralǵan tanymdyq beınerolıktiń avtory jeńimpaz atandy. Ol pavlodarlyq ustaz Igor Gnoeva @andreichadela 5 mıllıonnan astam qaralym jınaǵan logıkalyq jumbaq týraly beınerolıgi boldy.
Baıqaýdyń barlyq jeńimpazdaryna baǵaly syılyqtar – iPhone 15 Pro Max smartfondary beriledi. Bul olarǵa mıllıondaǵan TikTok qoldanýshylary úshin budan da sapaly beınerolıkter túsirýge múmkindik beredi.